Qazaqstannyń qazba otynynyń ımporty birtindep azaıady – EO arnaıy ókiliniń BAQ-pen kezdesýi
Joǵary shendi eýropalyq dıplomat bizdiń elde úsh kúndik saparmen júr. Onyń jumys baǵdarlamasynda Syrtqy ister mınıstri Muhtar Tileýberdimen, QR Prezıdentiniń Halyqaralyq yntymaqtastyq jónindegi arnaıy ókili Erjan Qazyhanovpen, Parlament depýtattarymen jáne bıznes ókilderimen kezdesý bar.
Jýrnalısterdi ekonomıkalyq, saıası jáne gýmanıtarlyq sıpattaǵy máseleler, EO arnaıy ókiliniń Eýroodaqpen odan ári yntymaqtastyq perspektıvalaryna kózqarasy qyzyqtyrdy.
Pıter Býrıan Prezıdent Qasym-Jomart Toqaevtyń júrgizip jatqan saıası reformalaryna oń baǵa berip, EO-nyń Qazaqstanǵa áleýmettik-ekonomıkalyq ózgerister protsesinde qoldaý kórsetýge daıyn ekenin atap ótti.
Saýda-ekonomıkalyq qatynastardy keńeıtý perspektıvalary týraly kóp aıtyldy. Sonymen qatar, eýropalyq dıplomat qazaqstandyq qazba otynnyń Eýropalyq odaq elderine ımporty birtindep qysqaratyny týraly eskertti.
«Biz «jasyl ekonomıkaǵa» kóshýimizge baılanysty qazba otynynyń ımporty birtindep tómendeıtinin jasyrmaımyz. Soǵan qaramastan, biz jańartylatyn energııa kózderin damytýdyń jańa múmkindikterin kórip otyrmyz», - dedi ol.
Degenmen, EO bizdiń elimizdiń jetekshi ınvestıtsııalyq seriktesi bolyp qalýdy josparlap otyr. Pıter Býrıan ınvestıtsııalyq yntymaqtastyqty odan ári damytý máseleleri boıynsha dıalog alańy aıasyndaǵy birlesken jumystyń mańyzyn aıtyp ótti.
«Sizderdegi ekonomıka kóbirek ınvestıtsııa qabyldaýǵa daıyn, Premer-Mınıstr bastaǵan alań jaqsy jumys istep, basym mindetterdi aıqyndady», - dedi ol.
Saýda-ekonomıkalyq qatynastardy keńeıtý taqyrybyn jalǵastyrý úshin Aqtaý teńiz portyn damytýdy qosa alǵanda, Eýropaǵa júk jetkizý úshin tıisti ınfraqurylym salý máselesi qoıyldy. Pıter Býrıan osy turǵyda EQYU-nyń 2019 jyldyń jazynan beri júzege asyrylyp kele jatqan «Jasyl porttar» jobasyn eske saldy.
«Biz EQYU-nyń «jasyl porttardy» damytý jónindegi bastamasyn qoldaımyz. Kaspıı teńiziniń porttary Eýropalyq odaqtyń Eýropa men Azııany jalǵaý jónindegi strategııasynyń pılottyq jobalary bolýy múmkin. 1990 jyldary bastalǵan TRASEKA jobasymen jaqsy negiz qalandy», - dedi ol.
BAQ-ty qyzyqtyrǵan máselelerdiń biri Qazaqstan azamattary úshin EO-nyń vızalyq rejımin yryqtandyrý boldy. Joǵary dárejeli eýropalyq dıplomat máseleniń egjeı-tegjeıine úńilmeı, taraptar osy taqyryp aıasynda jumysty jalǵastyryp, «qajetti maqsatqa qaraı jyljyp kele jatqanyn» aıtty.
EO-nyń Ortalyq Azııa boıynsha arnaıy ókili qyrǵyz-tájik shekarasyndaǵy qarýly qaqtyǵysqa pikir bildirip, Qazaqstan Prezıdenti Qasym-Jomart Toqaevtyń ony retteýge járdemdesý týraly usynysyn joǵary baǵalady.
