Qazaqstannyń qaı óńirlerinde jasóspirimder qylmysy órship tur
ASTANA. QazAqparat - QR Bilim jáne ǵylym mınıstrligi balalar men jasóspirimder qylmysy týraly sanaıǵaqtardy jarııalady, dep habarlaıdy QazAqparat tilshisi.
«Búginde kámelet jasyna tolmaǵan 5 myńnan astam qazaqstandyq esepte tur. Jasóspirimder arasyndaǵy qylmys Almatyda - 33,5%, Qyzylorda, Mańǵystaý oblystary men Astanada - 18%, Aqmola men Aqtóbe oblystarynda - 11%, Túrkistan oblysynda - 7,8% kóbeıgen. Arty ólimge ulasqan mektep oqýshylarynyń tóbelesin, birin-biri kemsitýin búkil el kórdi. Bir ǵana Aqtóbe oblysynda úsh oqıǵa tirkeldi, Shymkent kolledjiniń stýdent qyzdary oqýshy qyzdardy tonaǵany úshin ustaldy, Túrkistan oblysyndaǵy balalar synyptasyn qatigezdikpen sabaǵan. Ótken jyly bul oblysta 20 balalan aqsha jınaǵan jasóspirim ustaldy, balalardyń bireýi ózine qol jumsaǵan. Qaraǵandyda pıtstserııadaǵy orynǵa talasqan balalar tóbeles shyǵarǵan», - dedi Balalar quqyǵyn qorǵaý boıynsha QR Bilim jáne ǵylym mınıstriniń keńesshisi Raısa Sher QR BǴM alqasynyń keńeıtilgen otyrysynda.
Onyń aıtýynsha, 2018 jyly balalarǵa qatysty qylmystar sany eki myńnan asty. Túrkistan (207), Aqtóbe (187), Soltústik Qazaqstan (59) oblystarynda jáne Shymkent (2017 jyly - 122, 2018 jyly - 166), Astana (2017 jyly - 72, 2018 jyly - 84) qalalarynda balalarǵa qatysty qylmystyń órshýi baıqalady.
«Ótken jyly Prezıdent tapsyrmasymen balalardyń ál-aýqaty ındeksi júrgizildi. Eń tómengi ındekster Qostanaı (0,60%), Aqmola (0,65%) jáne Almaty (0,68%) oblystarynda tirkelgen. Al qaýipsizdik ındeksi jalpy Qazaqstan boıynsha 0,7 protsentti kórsetken», - dedi keńesshi.
Mınıstrlik keltirgen derekterge sáıkes, búginde bilim berý uıymdarynda eki myńnan astam mektep ınspektory men 7 myńnan astam psıholog jumys isteıdi. Odan bólek, 4 myńǵa jýyq áleýmettik pedagog bar.
