Qazaqstannyń qaı óńirlerinde jalaqy joǵary

NUR-SULTAN. QazAqparat – HeadHunter ınternet-servısi Qazaqstannyń qaı qalalary eń kóp jalaqy tóleıtinin jáne qazirgi tańdaǵy asa suranysqa ıe mamandyqtardy atady, dep habarlaıdy QazAqparat.

Osy jyldyń qańtar-qyrkúıegi aralyǵyndaǵy málimetterge jasalǵan taldaýdyń nátıjesi boıynsha, bos jumys oryndaryn usynatyn belsendi óńirlerdiń qataryna Almaty (43,29%), Nur-Sultan (20,37%), Qaraǵandy (5,98%), Atyraý (5,66%) jáne Shymkent (4,07%) qalalary endi.

Jumys berýshiler kelesideı salalarda vakansııalardy jıi ornalastyrady: saýda-sattyq (25,16%), býhgalterııa, basqarýshylyq esep-qısap, kásiporyndardyń qarjysy (11,60%), ákimshilik personal, bankter, ınvestıtsııalar, lızıng (9,15%), aqparattyq tehnologııalar, ǵalamtor, telekom (9,04%).

HeadHunter ındeksine sáıkes, Nur-Sultan, Almaty, Atyraý, Petropavl, Pavlodar, Óskemen, Qostanaı, Qaraǵandy qalalarynda bir bos jumys ornyna 4 úmitkerden keledi. Bul, eńbek naryǵynyń qalypty jaǵdaıyn kórsetedi.

Oral, Taldyqorǵan, Shymkent, Túrkistan, Kókshetaý qalalarynda bir vakansııaǵa 4-6 túıindeme jiberiledi. Bul, eńbek naryǵy jaǵdaıynyń kúrdeliligin bildiredi. Al Aqtóbe, Aqtaý, Taraz jáne Qyzylorda qalalarynda jumys izdeýshiler arasynda básekelestik deńgeıi joǵary.

Sondaı-aq ınternet-servıs aılyq eńbekaqy boıynsha málimetterdi usyndy.

Qazaqstan batysyndaǵy qalalar jalaqy mólsheri jaǵynan aldyńǵy qatarda tur. 2 mln teńge kólemindegi joǵary jalaqyny Atyraýdyń jumys berýshileri usynady. Sondaı-aq, qomaqty eńbekaqy tóleıtin qalalardyń qatarynda Aqtaý, Aqtóbe, Almaty, Nur-Sultan bar.

Al Taraz, Túrkistan, Shymkent shaharlary kesteniń eń sońǵy ornynda ornalasqan. Mundaǵy eń joǵary jalaqy mólsheri 500-540 myń teńgeni quraıdy.