Qazaqstannyń qaı óńirlerinde qoǵamdyq keńes belsendi ári tıimdi jumys isteıdi
Sarapshynyń aıtýynsha, búginde qoǵamdyq keńesterdiń jumysynan málimet beretin kazkenes.kz portaly iske qosylǵan.
«Bul portal qalyń jurtshylyqtyń, birinshi kezekte – jýrnalısterdiń otyrys hattamalaryna jáne túrli deńgeılerde qaralatyn máselelerge qol jetkizýine múmkindik beredi. Ol resýrs qoǵam men BAQ-tyń aldynda mańyzdy jáne senimdi aqparat kózine aınalýy úshin biraz ýaqyt qajet», - dedi Rahym Oshaqbaev ortalyq kommýnıkatsııalar qyzmetinde ótken brıfıngide.
Onyń sózine qaraǵanda, portaldyń mazmundy bolýy qoǵamdyq keńes hatshylarynyń, músheleriniń belsendiligine baılanysty bolmaq.
«Osy ınstıtýtty damytýdyń kelesi kezeńi retinde kem degende jyl saıyn nemese toqsan saıyn eń belsendi ǵana emes, búkil respýblıkany qamtıtyn úlken jınalystar, trenıngter ótkizý mańyzdy... Qazir biz gıperaktıvti qoǵamdyq keńesterdiń bolýyna baılanysty teńgerimsizdik kórip otyrmyz. Mysaly, Almaty qalasynyń qoǵamdyq keńesteri sondaǵy máselelerdi sheshýde tipti máslıhattan da yqpaldy ári tıimdi jumys istep otyr dep aıtýǵa bolady, Qaraǵandyny da mysal retinde alýǵa bolady» - dedi sarapshy.
