Qazaqstannyń qaı óńirlerinde ana ólimi jıi bolady
«Ana ólimin azaıtý jospary boıynsha 2019 jyldyń alǵashqy 6 aıyn qorytyndyladyq. Bul jospardy oryndaı almaǵan, tómen nátıje kórsetken úsh óńirdi – Atyraý, Qostanaı jáne Soltústik Qazaqstan oblystaryn erekshe atap ótken jón. Sondaı-aq, Almaty, Qaraǵandy, Shyǵys Qazaqstan oblystarynda ana ólimi kórsetkishi joǵary bolyp otyr», - dedi QR Densaýlyq saqtaý vıtse-mınıstri Lázzat Aqtaeva mınıstrlik alqasynyń otyrysynda.
Sonymen birge vıtse-mınıstr ana ólimin azaıtý boıynsha jedel josparyn júzege asyrý barysyn aıtyp berdi.
«Túrkistan, Aqtóbe, Shyǵys Qazaqstan jáne Soltústik Qazaqstan oblystarynda jedel medıtsınalyq járdemdi ortalyqtandyrý jumysy aıaqtaldy. Aımaqtandyrýdy jaqsartý boıynsha Jambyl, Túrkistan, ShQO jáne SQO-da jumystar atqaryldy. Qajetti medıtsınalyq qurylǵymen jabdyqtaý kólemi 81% deıin artty», - dedi L. Aqtaeva.
Mınıstrliktiń habarlaýynsha, ana ólimin azaıtý úshin bilikti mamandarmen qamtamasyz etý mańyzdy. Lázzat Aqtaevanyń aıtýynsha, 6 oblysta, ásirese Almaty, Qaraǵandy, Aqmola oblystarynda akýsher-gınekologtardyń tapshylyǵy baıqalady.