Qazaqstannyń qaı óńiriniń turǵyndary kóp tabys tabady
NUR-SULTAN. QazAqparat – Qazaqstanda Almaty oblysynyń turǵyndary basqa óńirlerdiń eńbekke jaramdy turǵyndaryna qaraǵanda kóp tabys tabady, dep habarlaıdy QazAqparat tilshisi.
Finprom.kz málimetterine sáıkes, Qazaqstanda eresek turǵyndardyń sany 12,1 mln adamdy quraıdy. Al sonyń 162-i el baılyǵynyń jartysynan kóbine ıelik etip otyr. Aıtalyq, 11,7 mln adamnyń nemese eldiń eresek turǵyndarynyń 96,6 paıyzy jylyna 10 myń dollarǵa jetpeıtin tabys tapsa, 2,7 paıyz nemese 326 322 azamattyń jylyna 10 myńnan 100 myń dollarǵa deıin tabysy bar. Bir jylda 100 myńnan 1 mıllıon dollarǵa deıin tabys tabatyndardyń sany 42 301 (0,35) adam. Al 1 mıllıonnan 50 mıllıon dollarǵa deıin tabysy bar 5 838 (0,05) adam bar. Qazaqstan baılyǵynyń 55 paıyzyn ýysynda ustap otyrǵan 162 adamnyń (0,001 paıyz) 112-si jylyna 50 mıllıonnan 80 mln dollarǵa deıin, 45-i 80 mıllıonnan 800 mln dollarǵa deıin, 5-eýi 2 mıllıardtan 3 mlrd dollarǵa deıin tabys tabady.
Osy jyldyń 2-toqsanynda halyqtyń ortasha aqshalaı tabysy 169,5 myń teńge boldy. Bul ótken jyldyń dál osyndaı kezeńimen salystyrǵanda 10,3 paıyzǵa (153,7 myń teńge) kóp. Óńirlik shekte Almaty turǵyndary barynsha kóp tabys tabady – 234,9 myń teńge (bir jyl buryn 218,8 myń teńge bolǵan edi). Al elordalyqtardyń ortasha tabysy 226,7 myń teńge (1 jyl buryn 213,5 myń teńge) bolsa, Qaraǵandy oblysy turǵyndarynyń tabysy bir jylda 9,4 paıyzǵa ósip 199,7 myń teńgege (bir jyl buryn 182,6 myń teńge) jetip otyr.
Turǵyndarynyń tabysy mol TOP-5 óńirge Mańǵystaý men Shyǵys Qazaqstan oblystary da kirip otyr. Bul óńirlerdiń turǵyndary tıisinshe 198,4 myń jáne 191,7 myń teńge tabys tabady. Elimizdiń 8 óńiri turǵyndarynyń tabysy ortasha respýblıkalyq mánnen birshama tómen. Turǵyndarynyń tabysy tómen óńirlerdiń qatarynda Túrkistan (100,4 myń teńge), Jambyl (128,1 myń teńge) jáne Qyzylorda oblystary (137,7 myń teńge) bar.
