Qazaqstannyń qaı óńirinde paraqorlyq keńinen etek jaıǵan
«Júıeli sybaılas jemqorlyqtyń jolyn kesý - organ qyzmetindegi basty mindet. Qazirgi kezeńde osy baǵytta 79 derek anyqtaldy. Sonyń eń kóbi Qaraǵandy oblysynyń úlesinde (8), onyń artynsha Almaty oblysy keledi (7). Astana qalasy, Aqmola, Shyǵys Qazaqstan, Qostanaı oblystarynda altaýdan, Atyraý, Batys Qazaqstan jáne Pavlodar oblystarynda beseýden osyndaı faktiler tirkelgen», - dedi Agenttiktiń qoǵammen baılanys jónindegi departamentiniń dırektory Arman Berdalın.
Onyń aıtýynsha, «kóleńkeli» ekonomıka sýbektilerine laýazymdy tulǵalardyń pana bolý faktilerin anyqtaý boıynsha aıtarlyqtaı jetistikterge qol jetken.
«Mundaı qylmystyń sany 2 ese artyp, buryn 66 bolsa, endi 130 qylmysqa jetken. Al jaýapqa tartylǵandar 2,5 ese artty - 34-ten 97-ge deıin. Olar negizinen ekonomıkalyq kontrabandaǵa demeýshilik jasaý (52), oıyn bıznesine (13) jáne aktsızdik ónimderdiń zańsyz aınalymyna (7) pana bolý faktilerimen baılanysty», - deıdi A. Berdalın.
Budan tys, departament dırektory bıznesti memlekettik organdardyń aralasýynan qorǵaý organ qyzmetiniń basty baǵyttarynyń biri ekendigin atap kórsetti.
«Kásipkerler quqyǵyn qorǵaý byltyrǵydan eki esege artty - byltyr 190 tulǵanyń quqyǵy qorǵalǵan bolsa, bıyl 408-ge jetip otyr. Osy baǵytta 236 qylmystyń joly kesildi. Sol qylmystar boıynsha 172 laýazymdy tulǵa jaýapqa tartylǵan, qazirgi deıin 78-i sottaldy. Osy baǵyttaǵy jumystardyń nátıjeli bolýyna «Bıznes jáne ınvestorlardy qorǵaý» jobasyn iske asyrý boıynsha agenttik bólimsheleriniń birlesken qyzmeti septigin tıgizip otyr. Jyl basynan beri jalpy quny 6,4 trln teńge bolatyn 229 bıznes joba baqylaýǵa alyndy», - dep túıindedi A. Berdalın.