Qazaqstannyń qaı qalasynda jyljymaıtyn múlik paıda ákeledi?
ASTANA. QazAqparat -Statıstıka komıtetiniń sońǵy aı týraly málimetterine negizdelgen «Krysha» saıtynyń esebinshe, Qazaqstandaǵy baspanany jalǵa berýdiń ortasha tabysy jylyna 8% quraıdy. Al turǵyn úıge salynǵan ınvestıtsııalardy óteýdiń ortasha merzimi - 13 jyl.
Jyljymaıtyn múliktiń tıimdiligi jaǵynan Qaraǵandy kósh bastap tur. Onda naryqtaǵy baǵa boıynsha páter qunyn (sharshy metri 175 myń teńge) 9 jyl ishinde jalǵa berip, qaıtaryp alýǵa bolady.
Mundaǵy kiris paıyzy da maksımaldy - jylyna 10.7 % paıyz. Aqtóbede páterge ketken shyǵyndy óteý merzimi shamamen 10 jyl. Aqtóbe oblysy ortalyǵyndaǵy páter jylyna 10.3 % tabys ákele alady.
Qyzylordada jyljymaıtyn múlikke salynǵan aqsha jylyna 8.9 paıyzben, 11 jylda aqtalady.
Suranys boıynsha birinshi orynda turǵanmen, Astana qalasy tabysty turǵyn úı ınvestıtsııalarynyń úshtigine engen joq. Bul álemdik tájirıbege sáıkes keledi. Páterdiń ár sharshy metrin 326 myń teńgege satyp alyp, jaldaý arqyly aı saıyn 95 myń teńgeden astam (8.8 %) tabys túsirip, 11 jylda páter qunyn shyǵarýǵa bolady. Óskemendegi páterdiń qunyn qaıtarý úshin de osyndaı merzim kerek (8.7 %).
Almatydaǵy bir bólmeli páterdiń ortasha quny 13 mıllıon teńge jáne jaldaý aqysy aı saıyn 91 myń teńgeden joǵary bolsa, 12 jylda páter ózin-ózi aqtaıdy. Tabys paıyzy - 8.4. Shymkent, Qostanaı, Semeı kórsetkishteri de shamalas.
Páter quny eń uzaq óteletin qalalar retinde Aqtaý, Taldyqorǵan jáne Tarazdy ataýǵa bolady. Bul óńirlerdegi páter jaldaý tabysy jylyna 5-7 %, al ótelý merzimi QR ortasha kórsetkishinen birneshe jylǵa joǵary. Máselen, Tarazda bir bólmeli páterdiń sharshy metri 187 myń teńge, aıyna 33-34 myń teńgege jalǵa berip, 19 jyldan keıin ǵana páter qunyn shyǵarýǵa bolady. Barlyq páter ıeleriniń salyq tólep, baspanany ustap turý úshin ketken shyǵyndaryn esepke alsaq, bul merzimder joǵarylaýy múmkin.
