Qazaqstannyń qaı qalalarynda páter baǵasy kóterildi
NUR-SULTAN. QazAqparat – Osy jyldyń qyrkúıek aıynyń qorytyndysynda jyljymaıtyn múlik baǵasy aıtarlyqtaı qymbattaǵan qalalar belgili boldy, dep habarlaıdy QazAqparat tilshisi krisha.kz-ke silteme jasap.
«Qyrkúıek aıynyń qorytyndysynda turǵyn úıi eń qymbat Qazaqstan qalalarynyń bestigin Almaty bastap tur. Shartty túrde aýdany 40 sharshy metr bolatyn páterdiń qazirgi quny 15,6 mln teńgeden asyp jyǵylady. Ekinshi orynda turǵan Nur-Sultan qalasynda dál osyndaı páterdi 13,3 mln teńgege satyp alýǵa bolady. Al Atyraýda mundaı páterdiń baǵasy 10 mln, Shymkentte 9,5 mln, Petropavlda 8,8 mln teńge», - delingen jarııalanǵan aqparatta.
Sarapshylardyń málimetterine sáıkes, aýdany 40 sharshy metrlik eń arzan baspana Qyzylorda qalasynda (5,4 mln teńge) tirkelgen. Dál osyndaı aýdandaǵy páterdi Aqtóbede 5,9 mln, Tarazda 6,5 mln, Semeıde 7,1 ıln, Pavlodarda 7,3 mln teńgege satyp alýǵa bolady.
Ótken aıdyń ishinde baspanaǵa ortasha baǵanyń 2,3 paıyzǵa ósýi Taldyqorǵan qalasynda tirkelgen. Bul qalada páterdiń bir sharshy metri 193 475 teńgeni quraıdy. Óskemende baǵa ósimi 2 paıyz shamasynda. Satýshylar páteriniń bir sharshy metrine 199 800 teńge suraıdy. Petropavlda baǵa 1,9 paıyzǵa ósip, sharshy metri 219 600 teńgege, al Shymkentte 1,8 paıyzǵa qymbattap 238 175 teńgege jetip otyr.
