Qazaqstannyń qaı qalalarynda qoqys óńdeıtin zaýyttar salynady

NUR-SULTAN. QazAqparat - Premer-mınıstr Asqar Mamın Májiliste maquldanyp, Senatqa joldanǵan Ekologııa kodeksi óndiriske qaýipsiz tehnologııalardy engizýge múmkindik beretinin málim etti, dep habarlaıdy QazAqparat tilshisi.

«Eldegi ekologııalyq jaǵdaıdy jaqsartý - Memleket basshysy Qasym-Jomart Toqaevtyń qoıǵan mańyzdy mindetterdiń biri. Álemniń kóptegen eli ekologııalyq qaýipsizdikti qamtamasyz etý jáne qorshaǵan ortany qorǵaý boıynsha joǵary maqsattardy alǵa qoıady. Osyǵan oraı eń ozyq álemdik tájirıbeni eskere otyryp, jańa Ekologııa kodeksi ázirlendi, onda «lastaýshy tóleıdi – túzeıdi» degen qaǵıda bekitilgen. Kodeksti bıyl qabyldaýǵa tyrysý kerek», - dedi Asqar Mamın Úkimet otyrysynda.

Onyń aıtýynsha jańa retteýshi júıeniń sheńberinde óndiriske jańa ekologııalyq qaýipsiz tehnologııalardy engizýge jol ashady.

«Ekologııa problemalary eldiń barlyq óńirlerinde qoǵammen talqylandy, ekologııalyq jaǵdaıdy jaqsartý boıynsha óńirlik jol kartalary bekitildi. Olardy iske asyrý, ozyq tehnologııalardy engizý, jańa ekologııa kodeksi normalaryn oryndaý 2024 jyly atmosferanyń lastaný ındeksin tómendetýge, jalpy ekologııalyq jaǵdaıdy jaqsartýǵa múmkindik beredi. Budan basqa, 2025 jylǵa deıin ormandardyń aýmaǵyn 500 myń gektarǵa ulǵaıtyp, 2 mlrd-tan astam aǵash otyrǵyzý josparlanǵan. Sondaı-aq Nur-Sultan, Almaty, Shymkent, Atyraý, Aqtóbe, Taraz qalalarynda qoqys óńdeıtin zaýyttardyń 6 pılottyq jobasyn iske qosý josparlanyp otyr. Bul keminde 200 mlrd teńge jeke ınvestıtsııa tartýǵa jáne qatty turmystyq qaldyqty óńdeý úlesin 30 paıyzǵa deıin jetkizýge múmkindik beredi», - dedi ol.