Qazaqstannyń qaı baǵytta damıtyndyǵy jastardyń saıası belsendiligine baılanysty - professor
ASTANA. QazAqparat - Álemniń damyǵan 30 eliniń qataryna qosylý úshin Qazaqstanda barlyq múmkindikter bar, dep esepteıdi tarıh ǵylymdarynyń kandıdaty, L.Gýmılev atyndaǵy Eýrazııa Ulttyq ýnıversıtetiniń halyqaralyq qatynastar kafedrasynyń professory Ámirjan Álpeıisov.
«Búgin biz keshegi kúnnen de jaqsy ómir súrýdemiz, erteń búgingi kúnnen de jaqsy bolatyny anyq. Ol úshin bizde barlyq múmkindikter bar. Eń bastysy ol úshin bizge áreket etý kerek, jumys istep, Memleket basshysyn barlyq qyrynan qoldaýymyz kerek, onyń Joldaýda aıtylǵan bastamalaryn, bılik reformalaryn júrgizý, bes ınstıtýtsıonaldy reformalardy, Qazaqstandy 30 damyǵan eldiń qataryna qosý boıynsha josparlaryn júzege asyrýǵa septesýimiz qajet», - dedi ol Qazaqstan halqy Assambleıasynyń etnomádenı birlestikteriniń «Nur Otan» partııasynyń jastar qanatynyń múshelerimen kezdesýinde.
Professordyń pikirinshe, el halqynyń bolashaǵy, Qazaqstannyń qaı baǵytta damıtyndyǵy - jastardyń saıası belsendiligne baılanysty.
Sonymen qatar ol búginde Qazaqstan jurtyn mazalap júrgen biraz jaıttarǵa da toqtaldy. Onyń oıynsha, memlekettik baǵdarlamalar men Prezıdent tapsyrmalaryn oryndamaǵan ákimderdiń jaýapkershiligin arttyrý qajet.
«Bizde ákimderdiń eshqaısysy jaýapkershilik almaıdy, eshkim eshteńege jaýap bermeıdi. Nege?! Óıtkeni aýyldyq ákim aýdandyq ákimge qaraıdy, aýdandyq ákim oblystyq ákimge jáne ózge de organdarǵa qaraıdy. Olar «Prezıdenttiń tapsyrmasy boıynsha» degen sózderdi jamylyp, jol jóndeý syndy mańyzdy mindetterin oryndaýdan qashady. Kúzde mektepterdiń basym bóligi nege daıyn bolmaıdy?! Aqsha bólinedi, degenmen mıllıardtaǵan qarajat ıgerilmeı turady. Eshkim buǵan jaýap bermeıdi. Biz tek jemqorlyqpen, paramen ustalǵandardy qamaımyz», - dep nalydy Ámirjan Álpeıisov.
Eske salsaq, 25 qańtarda Qazaqstan Prezıdenti Nursultan Nazarbaev memlekettik bılik tarmaqtaryn bólý máseleleri boıynsha úndeý jarııalady. Onyń basty maqsaty - Prezıdenttiń birqatar quzyryn Parlament pen Úkimetke berý. Osylaısha, Úkimet pen Parlamenttiń róli men jaýapkershiligi artpaq.
Jalpy Prezıdent óziniń 40 quzyryn Parlament pen Úkimetke berýdi usyndy.
