Qazaqstannyń Kásipodaqtar qaýymdastyǵy eń tómengi kúnkóris deńgeıin 30 myń teńgege deıin arttyrýdy usyndy
ASTANA. 25 qańtar. QazAqparat /Gúlmıra Álıakparova/ - Qazaqstan Kásipodaqtarynyń qaýymdastyǵy elimizdegi eń tómengi kúnkóris deńgeıin 30 myń teńgege deıin arttyrýdy usynyp otyr.
Búgin Astanada osy máselege qatysty dóńgelek ústel ótti. Onyń jumysyna memlekettik organdardyń, saıası partııalardyń, halyqaralyq eńbek uıymynyń, jumys berýshiler men kásipodaqtar birlestikteriniń ókilderi, sondaı-aq ekonomıster men ǵalymdar qatysty.
Dóńgelek ústelge qatysýshylar zaman aǵymyna saı laıyqty turmys deńgeıin qamtamasyz etý úshin eń tómengi tutyný sebetinniń qurylymyn qaıta qarap, ony tolyqtyrý máselelerin alǵa tartty.
Olardyń pikirinshe, búgingi tańda bazaly áleýmettik tólemder mólsherin, sonyń ishinde tómengi aılyq eńbekaqyny esepteý úshin respýblıkada zańnamamen belgilengen tómengi kúnkóris deńgeıi ómir shyndyǵymen janaspaıdy. Táýelsiz sarapshylar men kásipodaqtardyń esepteýi boıynsha áleýmettik bul kórsetkish ınflıatsııany eskergende keminde eki esege joǵary bolýy tıis. ıAǵnı sharaǵa qatysýshylar eń tómengi kúnkóris deńgeıin qazirgi 14 myń 952 teńgeden 30 myń teńgege deıin arttyrýdy usyndy.
Óz kezeginde QR Eńbek jáne halyqty áleýmettik qorǵaý vıtse-mınıstri Ásel Núsipova, qazirgi ýaqytta kúnkóristiń eń tómengi sheginiń deńgeıi men onyń qurylymy qolaıly jáne bıýdjettiń múmkindikterimen ólshemdes ekendigin aıtty.
«Árıne, aldaǵy ýaqytta onyń qurylymyn jetildirý kózdelip otyr. Tutynýdyń qurylymynda basymdyqty tek azyq-túlik ónimderine ǵana bermeı, azyq-túlik emes taýarlardy da eskerýdi jón kórip otyrmyz. Qazir bul baǵytta Halyqaralyq eńbek uıymymen jáne Dúnıejúzilik bankpen jumystar júrgizilýde», - dedi ol.
Vıtse-mınıstr málim etkendeı, 2011 jyly memleket áleýmettik járdemder men áleýmettik qamtamasyz etýlerge 1 trln. teńgeden astam qarjy jumsaý josparlanyp otyr. Mundaı kórsetkish Qazaqstanda buryn-sońdy bolmaǵan. Memlekettiń buǵan deıingi shyǵyny jyl saıyn 840 mlrd. teńgeni qurap keldi.
