Qazaqstannyń kásipodaqtar federatsııasy N.Nazarbaevtyń kandıdatýrasynyń prezıdenttik saılaýǵa usynylýyn qoldaıdy

ASTANA. QazAqparat - Qazaqstannyń kásipodaqtar federatsııasy Elbasy N.Nazarbaevtyń prezıdenttik saılaýǵa qatysý týraly sheshimin qoldaıdy. Bul týraly búgin atalǵan kásipodaq tóraǵasynyń orynbasary Qaırat Aıtýǵanov málim etti.

Onyń atap ótýinshe, qatarynda 2 mıllıonnan astam múshesi bar Kásipodaqtar federatsııasy is basyndaǵy Memleket basshysy Nursultan Nazarbaevtyń kezekten tys prezıdenttik saılaýǵa kandıdatýrasyn usynýyn tolyǵymen qoldaıdy.

«Qazaqstanda eńbek adamy úshin qajetti barlyq jaǵdaı jasalyp otyr. El Prezıdenti bastamashy bolǵany «Nur jol» baǵdarlamasy aıasynda júzdegen myń jumys oryndary ashylýda. Memleket óziniń áleýmettik mindettemelerin tolyǵymen oryndaıdy»,- dedi ol.

Sonymen qatar Q.Aıtýǵanov Qazaqstannyń kásipodaqtar federatsııasy eldiń áleýmettik-ekonomıkalyq jańǵyrtylýyn jedeldetýge, qazaqstandyqtardyń ál-aýqatyn arttyrýǵa baǵyttalǵan bastamalardy qoldaıtyndyǵyn basa aıtty.