Qazaqstannyń kásipqoı boks quramasy WSB chempıonatyndaǵy alǵashqy matchyn ótkizedi
ASTANA. 19 qarasha. QazAqparat /Jasulan Amanbaıuly/ - Erteń Astanadaǵy «Dáýlet» sport kesheninde Búkilálemdik boks serııasynyń (WSB) nusqasy boıynsha Qazaqstannyń kásipqoı boks quramasy Azııa konferentsııasyndaǵy alǵashqy matchyn ótkizedi.
Bıyl shilde aıynda Qazaqstannyń kásipqoı boks quramasy dep tanylǵan «Astana arlandary» kásipqoı boksshylar klýby Ońtústik Koreıanyń «Incheon red wings» komandasyn qabyldaıdy. Soǵan oraı, búgin eki komandanyń boksshylary match aldyndaǵy salmaq ólsheý rásimin jasady.
«Erteńgi match Búkilálemdik boks serııasynyń resmı jarysynyń tusaýkeser dodasy dep esepteımiz. Bizdiń quramada 15 boksshy bar. 5 salmaq dárejesiniń árbirinde 3 boksshydan jasaqtaldy», deıdi «Astana arlandary» klýbynyń bas dırektory Bolat Mankenov.
Bul jekpe-jekterge elimizdiń atynan Qanat Ábýtálipov (54 kg), Mereı Aqshalov (61kg), Alibı Nurmatov (75 kg), sonymen qatar komandadaǵy sheteldik legıonerler Amponsah Maksvell (85 kg) men Istvan Bernat (+91 kg) shyǵady.
Jalpy AIBA uıymynyń qoldaýymen bolyp jatqan WSB klýbtyq jarysy Azııa, Eýropa jáne Amerıka aımaqtyq konferentsııalary boıynsha ótkizilýde. Lıganyń árbir maýsymynyń sońynda ár salmaq dárejelerinen 2 úzdik boksshy arnaıy reıtıngtik júıe boıynsha anyqtalady. Qazaqstannyń «Astana arlandary» boksshylary Qytaı, Ońtústik Koreıa jáne Ázirbaıjan memleketteriniń bylǵary qolǵap sheberlerimen birge Azııa konferentsııasyna kiredi.
WSB chempıonaty áýesqoı boksshylarǵa kásipqoı boksta baq synaýlaryna múmkindik beretin platforma bolyp tabylady. WSB áýesqoı boksshylarǵa óz eliniń namysyn Olımpıadalyq oıyndarda qorǵaýǵa tyıym salmaıdy.
