Qazaqstannyń Qasıetti Taqpen ózara qatynas ornatýy musylman qaýymdastyǵy tarapynan eshqandaı túsinbeýshilik týdyrmaýy tıis - Q. Lama Sharıf
ASTANA. 19 qyrkúıek. QazAqparat - Qazaqstannyń Qasıetti Taqpen ózara qatynas ornatýy musylman qaýymdastyǵy tarapynan eshqandaı túsinbeýshilik týdyrmaýy tıis.
Búgin Májiliste «Qazaqstan Respýblıkasy men Qasıetti Taq arasyndaǵy Ózara qatynastar týraly kelisimdi ratıfıkatsııalaý týraly» zań jobasyna oraı depýtattar saýalyna jaýap bergen QR Din isteri agenttiginiń tóraǵasy Qaırat Lama Sharıf osylaı málim etti.
Toqtala ketetin jaıt, zań jobasyn talqylaý barysynda depýtat Tólegen Ibraev sońǵy ýaqytta musylman qaýymdastyǵy men Vatıkan arasyndaǵy qarym-qatynasqa selkeý túsip otyrǵanyn aıta kele, «Bul zań qabyldansa musylman elderi Qazaqstannyń qadamyna qalaı baǵa berer edi?» degendi alǵa tartqan edi.
«Jaqynda ǵana Rım papasy Lıvanǵa sapar shekken bolatyn. Sondyqtan da katolıkter men musylmandar arasynda óte jaqsy qarym-qatynastar bar ekenin baıqap otyrmyz. 2008 jyly Saýd Arabııasynyń Koroli de Rım Papasymen kezdesken edi. Onyń ústine Rım katolık shirkeýi halyqaralyq deńgeıde álemdik dástúrli dinder qataryna jatady. Sondyqtan da, bul qadam eshqandaı túsinbeýshilik týdyrmaıdy dep senemiz», - dep jaýap berdi Din isteri agenttiginiń tóraǵasy.
