Qazaqstannyń qasıetti oryndary týraly alǵashqy jınaqtar jaryq kórdi
Qazaqstannyń jalpyulttyq jáne óńirlik qasıetti oryndarynyń tolyq tizimi engen bul jınaqtar alǵash ret jaryqqa shyǵyp otyr.
«Bizdiń basty mindetimiz - Qazaqstandaǵy qasıetti oryndar tizimin jasaý ǵana emes, bul nysandardy rýhanı qundylyqtardyń kartasyna aınaldyrý. Kez kelgen qazaqstandyq elimizdiń batysy men shyǵysyndaǵy, ońtústigi men soltústigindegi qasıetti jerlerdi birdeı bilýi kerek, osylaısha qasıetti oryndar arqyly tarıhty júıeli túrde biledi, elimizdiń birtutas tarıhyn bilý ulttyq biregeılikke jeteleıdi», - dedi «Qasıeti Qazaqstan» ǵylymı-zertteý ortalyǵynyń dırektory Berik Ábdiǵalıuly qos kitaptyń tusaýkeser rásiminde.
«Qazaqstannyń jalpyulttyq qasıetti nysandary» kitaby úsh tilde 1000 danamen jaryqqa shyqty. Onda 100 kıeli nysan «Erekshe baǵalanatyn tabıǵı mura eskertkishteri», «Arheologııalyq eskertkishter jáne ortaǵasyrlyq qalalyq ortalyqtar», «Dinı jáne ǵıbadat ortalyqtary», «Tarıhı tulǵalarǵa qatysty qasıetti oryndar», «Saıası, tarıhı oqıǵalarǵa baılanysty qasıetti oryndar» bolyp bes topqa jikteledi.
«Qazaqstannyń óńirlik qasıetti nysandary» kitaby 1000 danamen eki tilde jaryq kórdi. Bul eńbekti ázirleýde ǵalymdar el óńirlerine ekspedıtsııa jasap, jergilikti mańyzy bar nysandar tarıhymen jete tanysqan jáne 500-ge jýyq nysandy jınaqqa engizgen.
Sonymen birge, Berik Ábdiǵalıuly ǵylymı-zertteý ortalyǵynyń ataýyn bekiterde «Qasıetti Qazaqstan» sózine toqtaǵandaryn túsindirdi.
«Qazaqta nazardan tys qalmaǵan eleýli oryndardy kıeli, qasterli, qasıetti, áýlıeli degen birneshe atpen ataıdy. Bizdiń tizimge engen barlyq nysandy kıeli dep ataýǵa bolmaıdy. Máselen, Almaty men Astanada Qazaq eli monýmenti, Báıterek, Respýblıka alańy, Jeltoqsan eskertkishi syndy eldiń birligin kórsetetin eskertkishter bar. Olardy kıeli dep aıtýǵa kelmeıtin shyǵar, biraq biz úshin mańyzdy qundylyq bolǵandyqtan, bul nysandar jınaqqa enip otyr. Odan bólek, tizimge tarıhı tulǵalarǵa qatysty, saıası oqıǵalarǵa qatysty oryndar enip otyr. Sondyqtan, jalpy azamattyq turǵyda, memlekettik múdde turǵysynan «Qasıet» sózi barlyǵyn qamtyp tur dep esepteımiz», - dep túsindirdi ortalyq basshysy.
Qazaqstannyń jalpyulttyq jáne óńirlik qasıetti oryndary týraly alǵashqy jınaqtar respýblıka aýmaǵyndaǵy kitaphanalarǵa taratylady.
Aıta keteıik, 2017 jyldyń sáýir aıynda Elbasy Nursultan Nazarbaev óziniń «Bolashaqqa baǵdar: rýhanı jańǵyrý» baǵdarlamalyq maqalasynda el aýmaǵyndaǵy qasıetti oryndardy ózara sabaqtastyra otyryp, ult jadynda birtutas keshen retinde ornyqtyrý úshin «Qazaqstannyń kıeli jerleriniń geografııasy» jobasyn júzege asyrýdy tapsyrǵan edi.
Mamyr aıynda QR Mádenıet jáne sport mınıstrligi «Qazaqstan Respýblıkasynyń Ulttyq Mýzeıi» RMKK janynan
«Qasıetti Qazaqstan» ǵylymı-zertteý ortalyǵy quryldy.
