Qazaqstannyń kásibı Parlamentine búgin 20 jyl toldy - Májilis spıkeri
ASTANA. QazAqparat - Qazaqstannyń qos palataly kásibı Parlamentine 20 jyl toldy. Búgin QR Parlamenti Májilisiniń jalpy otyrysynda palata spıkeri Qabıbolla Jaqypov atalǵan dataǵa oraı áriptesterin quttyqtap, olardyń eńbegine tabys tiledi.
«Dál búgin Parlament 20 jasqa toldy. 1996 jyldyń 20 qańtarynda Qazaqstannyń qos palataly Parlamenti óz jumysyna kirisken bolatyn. Sondyqtan da, barshańyzdy osynaý tarıhı datamen quttyqtaımyn. Sonymen qatar, osydan dál 4 jyl buryn, 2012 jyldyń 20 qańtarynda besinshi shaqyrylǵan Májilis te óz qyzmetine kirisken bolatyn. Bul da biz úshin erekshe kún»,- dep atap ótti spıker Q. Jaqypov.
Aıta keteıik, Qazaqstannyń kásibı qos palataly Parlamenti eldegi konstıtýtsııalyq reformalar nátıjesinde 1996 jyly alǵash resmı qyzmetke kiristi.
Sonymen qatar, ótken aptada besinshi shaqyrylǵan Májilisti taratyp, merziminen buryn saılaý ótkizý týraly depýtattardyń ózderi bastama kóterdi. Májilis depýtattary bul másele boıynsha Memleket basshysynyń atyna Úndeý joldaǵan bolatyn. Qazir bul bastama qoǵamda qyzý talqylanyp jatyr. Jurtshylyqtyń basym bóligi álemdik ahýaldy, ishki baǵdarlardy eskere kele, bundaı jaǵdaıda merziminen buryn saılaý ótkizý bastamasyna qoldaý bildirýde.
