Qazaqstannyń kásibı boksshylarynyń aldaǵy aıqastary
ASTANA. QazAqparat - Qazaqstannyń kásibı boksshylarynyń aldaǵy jekpe-jekteri týraly málimet jarııa etildi.
Qazaqstan kásibı boksy jobasynyń Feısbýktegi paraqshasynyń habarlaýynsha, 8 shilde kúni Ispanııanyń Bılbao qalasynda qazaqstandyq boksshy Erjan Zalılov kásibı rıngtegi kezekti jekpe-jegin ótkizedi. Onyń qarsylasy ázirge anyqtalǵan joq. Aıta keteıik, sońǵy ret 17 naýryz kúni Reseıde ótken aıqasta Zalılov tóreshilerdiń biraýyzdan bergen sheshimimen ózbekstandyq boksshy Hýmoıýn Rýstamovty jeńgen bolatyn.
Ol barlyq 7 jekpe-jeginde jeńiske jetti. Eki aıqas belgilengen ýaqyttan buryn aıaqtaldy.
Bolashaǵynan zor úmit kúttiretin qazaqstandyq boksshy Meıirim Nursultanov óziniń kelesi jekpe-jegin 15 shilde kúni Inglvýdte (AQSh-tyń Kalıfornııa shtaty) ótkizedi. Qarsylasynyń esimi ázirge atalǵan joq. Bul keshtiń basty oqıǵasy alǵashqy jeńil salmaqta meksıkalyq Mıgel Berchelt (31-1, 28KO) pen japondyq Takashı Mıýroı (31-3-2, 24KO) arasyndaǵy WBC nusqasy boıynsha álem chempıony tıtýlyna talas bolmaq.
Atalǵan shoýdyń kelesi jekpe-jeginde osy salmaqtaǵy WBA (Super) chempıony panamalyq boksshy Djezrıl Korrales (21-1, 8KO) belbeýin qorǵaý aıqasynda meksıkalyq Robınson Kastellanosqa (24-12, 14KO) qarsy shyǵady.
23 jastaǵy Nursultanovtyń úlesinde kásibı rıngtegi eki jekpe-jekten alǵan eki jeńisi (1KO) bar. Qazaqstandyq boksshy orta salmaq sanatynda shyǵady (160 fýntqa deıin - 72,6 kg).
Musa Turǵynalıev AQSh-ta kásibı rıngtegi alǵashqy aıqasqa qatyspaqshy.
Sonymen qatar, Aıdar Sháribaev kelesi jekpe-jeginde chempıondyq beldikke talasady. Áýesqoı boksta 250 kezdesý ótkizgen. Osydan úsh jyl buryn kásipqoı boksqa oıysqan jigit, 6 jekpe-jek ótkizip, barlyǵynda jeńis tuǵyrynan kórindi. Onyń ishinde bes qarsylasyn nokaýtpen sulatty. Aıdar alǵash karerasyn bastaǵan tusta taǵy bir qazaqstandyq kásipqoı boksshy Qanat Islamnyń sparrıng-qarsylasy bolyp, onymen birge sheteldegi oqý-jattyǵý jıyndarynda qatar júrdi.
EKSPO-2017 kórmesi aıasynda Aıdar WVA INTERCONTINENTAL tujyrymy boıynsha chempıondyq beldikke talasady. Jaýapty básekege tyńǵylyqty daıyndalyp, oqý-jattyǵý jıyndaryn ótkizý úshin Aıdar AQSh-qa attanady. Aıdardyń chempıondyq beldikke talasatyn qarsylasynyń esimi ázirge belgisiz.
