Qazaqstannyń Qarjy polıtsııasynyń taratylatyny týraly aqparat rastalǵan joq
ASTANA. QazAqparat - Qazaqstanda Qarjy polıtsııasynyń qyzmeti memlekettik organ retinde taratylmaıdy. Bul týraly búgin Astanada Ortalyq kommýnıkatsııalar qyzmetinde QR Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń birinshi orynbasary Andreı Lýkın málim etti.
Eske sala keteıik, keıbir aqparat quraldarynyń betterinde Qarjy polıtsııasynyń qyzmeti basqa memlekettik organdarǵa berilip, múldem jabylýy múmkin degen aqparat taraǵan bolatyn. Bul qaýesetti búgin A.Lýkın rastaǵan joq.
«Jemqorlyqqa jáne ekonomıkalyq qylmysqa qarsy kúres memlekettik organyn taratý týraly másele aldymyzda múldem turǵan joq. Degenmen zaman aǵymyna saı kez kelgen memlekettik organnyń qyzmeti jetildiriletini sózsiz. Sondyqtan árıne, árbir vedomstvonyń tıimdiligi men fýnktsıonaldylyǵyn arttyrý múmkindikteri qaralady. Ekonomıkalyq qylmysqa jáne sybaılas jemqorlyqqa qarsy kúres organyn joıý máselesi qaralyp jatqan joq», - dep naqtylady agenttik ókili.
