Qazaqstannyń Qarýly Kúshterinde 8,5 myńnan asa áıel azamatsha qyzmet etedi
Baspasóz qyzmetiniń habarlaýynsha, qarýly kúshter qatarynda qyzmetin atqaryp júrgenderdiń 4-eýi polkovnık, 30-y podpolkovnık, 120-dan asa maıor sheninde. «Áskerı qyzmetshi áıelder ózderine júktelgen jumystardy atqarýda kásibılikteri men tııanaqtylyqtaryn kórsetip, qyzmettik mindetterine adaldyqtaryn tanytyp, áriptesterine úlgi bolyp keledi. Bólimder men mekemelerdiń qoǵamdyq ómirine, mádenı-demalys sharalaryna, jeke quramnyń oqý-tárbıelik úderisine de belsene aralasady. Mysaly, jas jaýyngerdiń beıimdelý kezeńinde árbir áskerı qyzmetshi áıel jas sarbazdyń qasynan tabylyp, onyń qaz turyp, qadam basýyna kómek kórsetedi. Sondaı-aq, olar jeke quram arasyndaǵy áskerı tártipti kúsheıtýdegi komandırler men basshylardyń senimdi serigi de bolyp otyr», - delingen baspasóz habarlamasynda.
Mınıstrlik málimetterine sáıkes, byltyr vedomstvoda sheshim qabyldaý deńgeıinde ákimshilik memlekettik qyzmetter atqaratyn áıelderdiń úlesi 18 paıyzǵa artqan. Departament basshylyǵy men orynbasarlyq qyzmetterge 4 áıel taǵaıyndalǵan.
Toqtala ketetin jaıt, halyqaralyq áıelder kúni qurmetine oraı Qorǵanys mınıstri qol qoıǵan buıryqqa sáıkes, birqatar qyz-kelinshekterge kezekti jáne kezekten tys áskerı ataqtar tabys etildi. Úzdikter gramotalarmen nagradtaldy.