Qazaqstannyń Qarýly Kúshterinde 1000 polkovnık qyzmet etedi
QR Qorǵanys mınıstrliginiń «QazAqparat» agenttigine bergen resmı jaýabynda osyndaı málimetter keltirildi.
Jalpy Qazaqstannyń Qarýly Kúshteri qurlyqtaǵy ásker, áýe qorǵanysy men áskerı-teńiz kúshterinen turady. Sonymen qatar arnaıy strategııalyq maqsattarǵa ıe áskerler quryldy. Olardyń ishine aeromobıldi ásker, zymyran áskeri jáne artıllerııa, arnaıy ásker kiredi. Eldiń ákimshilik shekaralarynda aımaqtyq qolbasshylyqtar qurylǵan: «Astana», «Shyǵys», «Batys», «Ońtústik».
Sonymen qatar, bitimgerlik jasaqtar bar. Respýblıkada bitimgershilik operatsııalarǵa daıyndaıtyn ortalyq jumys isteıdi, onda Birikken Ulttar Uıymy mıssııalaryna qatysqan ofıtserler óz tájirıbelerimen bólisip otyrady. Qazirgi tańda BUU-nyń bitimgershilik mıssııalarynda QR Qarýly Kúshteriniń tórt ofıtseri qyzmet etýde. Áskerı baıqaýshylar retinde olar Batys Saharadaǵy mıssııaǵa qatysýda. 2014 jyldyń shilde aıynan beri BUU-nyń Batys Saharadaǵy jáne Kot-d'Ivýardaǵy beıbitshilikti saqtaý mıssııalarynda baıqaýshy retinde Qazaqstannyń 11 ofıtseri júmys istedi.
QR Qorǵanys mınıstrliginiń málimetteri boıynsha, 2013 jyly Qazaqstan «Qazbat» bitimgershilik batalonyn Irak jerine attandyrǵan bolatyn. Qazaqstandyq ınjenerlik-saperlik jasaq Irakta BUU-nyń turaqtandyrý kúshteri qatarynda abyroımen qyzmet etip kelgen edi. Jasaq Irak jerinde jarylmaı qalǵan oq, snarıad, mınalardy izdestirý, anyqtaý, joıý boıynsha jumystardy atqardy. 2003-2008 jyldar aralyǵynda «Qazbat» Ýkraına jáne AQSh Qarýly Kúshterimen birge 4 mıllıonnan astam jarylǵysh zatty joıyp jibergen.
Sonymen birge Qazaqstannan barǵan saperler Iraktyń Qarýly Kúshteriniń 340 mamanyn jarylǵysh zattardy anyqtaý jáne joıý boıynsha jumystarǵa daıyndap shyqty.
QR áskerıleri «Delta» bazasynyń aınalasyndaǵy 9646 qýma metr aımaqty qaýipti jarylǵysh zattardan tazartty. Aýyzsýmen qamtamasyz etý úshin sýǵa tazartý jumystaryn da júrgizdi. Jasaq qataryndaǵy medıtsınalyq qyzmetkerler Iraktyń 3 myńnan astam turǵynyna tegin kómek kórsetti.
