Qazaqstannyń Qarýly Kúshteri qatarynda «Jeńiske taǵzym» atty aktsııa bastaldy

ASTANA. QazAqparat - Búgin Qazaqstannyń Qarýly Kúshterinde «Jeńiske taǵzym» aktsııasy bastaldy. Shara QR Qarýly Kúshteriniń Joǵarǵy Bas qolbasshysy Nursultan Nazarbaevtyń atynan Uly Otan soǵysyndaǵy Jeńistiń 70 jyldyǵyna oraılastyrylyp otyr.

Aktsııa aıasynda qazaqstandyq armııanyń áskerı qyzmetkerleri elimizdiń ár túkpirindegi áskerı bólimderge Jeńis jalaýyn tapsyratyn bolady. Jalaý tapsyrý estafetasyna 7 áskerı bólimniń áskerı qyzmetkerleri qatysady. Jeńis jalaýy estafetasyn bastaý Astanadaǵy 36-shy desanttyq-shabýyldaý brıgadasyna buıyrdy.

Odan ári estafetany Qaraǵandy (5 qańtar), Semeı (6 qańtar), Qapshaǵaı (8 qańtar), Otar (9 qańtar), Aqtaý (12 qańtar) jáne Almaty (13 qańtar) jalǵastyrady. Barlyq qalalarda aktsııa 11:00-de ashylatyn bolady.

Aıta keteıik, aktsııa aıasynda QR Qarýly Kúshteriniń Joǵarǵy Bas qolbasshysy Nursultan Nazarbaevtyń atynan Uly Otan soǵysynyń ardagerleri quttyqtalyp, baǵaly syılyqtar alady. Jeńimpaz-jaýyngerlerdi QR Qorǵanys mınıstrliginiń qurmetti qaraýyl rotasy qarsy alady.

Aktsııa 2015 jyldyń 15 qańtarynda aıaqtalyp, Jeńis jalaýshasy Halyq Qaharmany, Armııa generaly Saǵadat Nurmaǵambetov atyndaǵy «Jas Ulan» mektebine tabystalady.