Qazaqstannyń Qarýly Kúshteri Áskerı barlaýshy kúnin atap ótýde

NUR-SULTAN. QazAqparat - 5 qarasha – barlaý bólimsheleri áskerı qyzmetshileriniń kásibı merekesi. 1992 jyly dál osy kúni Qazaqstan Qarýly Kúshteri Bas shtabynyń Barlaý basqarmasy quryldy.

Áskerı barlaý memlekettiń qaýipsizdigin qamtamasyz etýde mańyzdy ról atqaryp, eldiń qorǵanys qabiletin nyǵaıtýǵa aıtarlyqtaı úles qosady, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Búgingi kúni arnaıy operatsııalar kúshteri, barlaý bólimderi men arnaıy maqsattaǵy bólimsheler qarqyndy damýda.

Jedel, jaýyngerlik daıarlyq is-sharalary barysynda barlaýshylar daǵdylaryn jáne sheberlikterin jetildirip, shyńdaıdy.

2021 jyly barlaý bólimsheleriniń áskerı qyzmetshileri «Qalqan», «Іzdeý», «Otpantaý» oqý-jattyǵýlaryna qatysty. Sońǵy manevrler barysynda áýe jáne jerústi barlaýynyń búkil is-qımyldaryn ásker toptary iske asyrdy. Nátıjesinde shartty qarsylastyń kúshteri men quraldaryna joǵary dál soqqylar jasaldy. Oqý-jattyǵýlar men keshendi tekserýlerdiń nátıjeleri Qazaqstannyń Qarýly Kúshterinde mamandardy daıarlaýdyń sheteldikterden kem túspeıtin derbes, otandyq júıesi barlyǵyn dáleldeıdi.

Asa kúrdeli, ómirge qaýipti tapsyrmalardy oryndaýda barlaý bólimsheleriniń áskerı qyzmetshileri aıryqsha tózimdilik, batyldyq pen kásibı sheberlik kórsetedi.

Otanǵa shyn berilý, boryshyńdy seziný, janqııarlyq tanytý – memleket múddelerin qorǵaý jolyndaǵy áskerı barlaýshylardyń basty qasıetteri.