Qazaqstannyń kartochkalyq tólem naryǵy endi qarapaıym ári tıimdi mobıldi mPOS-termınaldarmen tolyqpaq
ALMATY. 11 qyrkúıek. QazAqparat - Endi kásipkerler úshin POS-termınaldar qoljetimdi bola túspek.
Bul týraly búgin Almatyda Qazaqstan halyq banki Basqarma tóraǵasynyń orynbasary Marat Álmenov málimdedi. Jańa sheshim bolyp sanalatyn mobıldik tólem termınaldaryn (mPOS-termınaldar) banktik kartochkalarmen tólem qabyldaý úshin «Qazaqstan halyq banki» AQ men «KaR-Tel»JShS mobıldik ekvaırıng qyzmetin usynýshy Pay-me kompanııasymen birlesip jasap otyr. Marat Álmenovtiń aıtýynsha, mobıldik POS-termınaldar qazir qoldanylyp júrgen POS-termınaldardyń únemdi ári qarapaıym balamasy bolyp tabylady. Bul - iOs nemese Android operatsııalyq júıeleriniń bazasynda jumys isteıtin smartfonǵa nemese planshettik kompıýterge aýdıo-ajyratqysh arqyly qosylatyn arnaýly portatıvtik sanaýysh qurylǵy. Qurylǵynyń mobıldik termınal retinde jumys isteýi úshin nebári Pay-me júıesinde tirkelip, App Store nemese Google Play-den osy attas tegin mobıldik qosymshasyn ornatý ǵana qajet. Osy tehnıkalyq sheshimniń negizgi artyqshylyǵy onyń mobıldi bolýynda: ol kez kelgen saýda-servıstik kásiporynǵa Visa jáne MasterCard halyqaralyq tólem júıeleriniń banktik kartochkalaryn ıelenýshi klıentterden qolma-qol aqshasyz tólemdi kez kelgen jerde jáne kez kelgen ýaqytta qabyldaýǵa múmkindik beredi. Qurylǵynyń tolyqqandy jumys isteýi úshin ınternet júıesine qoljetimdilik bolýy qajet. «mPOS-termınalynyń quny statsıonarlyq POS-termınaldyń qunynan bes esedeı tómen. Tólem júrgizý úshin kartochkany sanaýysh qurylǵy arqyly ótkizip, mobıldik termınal qosylyp turǵan smartfon (planshet) ekranyna klıenttiń qolyn qoıý qajet. Saýda chegi kartochka ıesiniń elektrondyq meken-jaıyna nemese kartochka ıesi kórsetken mobıldik telefonǵa SMS-habar túrinde jiberiletin bolady. Qurylǵynyń taǵy bir basty artyqshylyǵy - mobıldik tólem termınaldarynyń qaýipsizdiginde, bul termınaldarda kartochkadan oqylǵan aqparat saqtalmaıdy, ol ári qaraı shıfrlengen kúıinde protsessıng qyzmetine jiberiledi. Árbir mPOS qurylǵysy kartochkadaǵy málimetti kupııa saqtaýǵa múmkindik beretin qaýipsizdik modýlimen jabdyqtalǵan», - deıdi M. Álmenov.
