Qazaqstannyń karate quramasy Álem kýbogynda ekinshi oryn aldy
ASTANA. QazAqparat - WGKF-tyń uıymdastyrýymen Ýkraınanyń Odessa qalasynda karate godzıý-rıýdan Álem kýbogy ótti, dep habarlaıdy QazAqparat «SPORTINFORM» SAA-ǵa silteme jasap.
Týrnırde álemniń 15 elinen jınalǵan sportshylar tatamıge shyqty. Nurhan Atashbaıdyń basshylyǵyndaǵy Qazaqstan quramasy jarysqa on eki karate sheberin aparǵan bolatyn.
Álem kýbogynyń qatysýshylary karateniń kata, kobýdo, shobý-kýmıte, ırıkýmı-dzıý, ırıkýmı-go baǵyttary boıynsha ózara myqtyny anyqtady. Qazaqstandyqtar osy baǵyttarda, árbir salmaq sanatynda úzdik úshtik qatarynan kórindi.
Jalpykomandalyq esepte Qazaqstan 13 altyn, 8 kúmis jáne 5 qola medal alyp, týrnırde ekinshi oryndy ıelendi.
