Qazaqstannyń ıslamdyq ınfraqurylymdy ıntegratsııalaý bastamasyn qoldaımyz - Islam bankiniń basshysy

ASTANA. QazAqparat - Qazaqstannyń ıslamdyq ınfraqurylymdardy ıntegratsııalaý bastamasyn qoldaımyz. Bul týraly búgin «Astana» halyqaralyq qarjy ortalyǵynyń resmı ashylý rásiminde Islam damý bank tobynyń prezıdenti Bandar Hadjar aıtty, dep habarlaıdy QazAqparat tilshisi.

«Islam damý banki toby 20 jyl boıy ekijaqty yntymaqtastyq aıasynda Qazaqstannyń bastamalaryna qoldaý bildirip keledi. Bizdiń portfolıomyz shamamen 2,4 mlrd dollarǵa jetti jáne ınfraqurylymdar men jeke sektordy damytýǵa baǵyttalǵan», - dedi ol.

Onyń atap ótýinshe, «Astana» halyqaralyq qarjy ortalyǵy TMD elderi aýmaǵynda ıslamdyq qarjylyq qyzmet ındýstrııasyn damytýdy josparlap otyr. Al bul Islam damý banki úshin 180 mln turǵyny bar jańa naryq sanalady.

Munan bólek, Bandar Hadjar Islam damý banki toby Qazaqstan Prezıdenti Nursultan Nazarbaev jarııa etken ıslamdyq ıfraqurylymdyq ıntegratsııa bastamasyna qoldaý kórsetetinin basa aıtty.

«Islam damý banki tobynyń atalǵan bastamany Qazaqstan Úkimeti júzege asyrýynda barlyq qyzmetteri men kómegin qoljetimdi jasaıdy. Bul Qazaqstan men bizdiń top elderiniń arasyndaǵy óńirlik jáne halyqaralyq yntymaqtastyqtyń damýyna serpin beredi», - dedi ol.