Qazaqstannyń ıslam álemindegi orny erekshe - Muhammed ben Zaıd Ál Nahaıan

ÁBÝ-DABI. QazAqparat – Qazaqstan men Birikken Arab Ámirlikteri Islam Yntymaqtastyǵy Uıymynyń (IYU) abyroıyn arttyrýǵa birge kúsh salyp keledi. QR Prezıdenti Qasym-Jomart Toqaevpen kezdesý barysynda Ábý-Dabıdiń murager hanzadasy sheıh Muhammed ben Zaıd Ál Nahaıan osylaı dep pikir bildirdi, dep habarlaıdy QazAqparat tilshisi.

«Aımaqtaǵy jaǵdaıdy bilesizder. Osyǵan oraı BAÁ máselelerdi beıbit jolmen sheship, toleranttylyqty kúsheıtýge, halyqaralyq arenada beıbitshilik pen kelisimniń bekı túsýine múddeli», - dedi Muhammed ben Zaıd Ál Nahaıan.

Ábý-Dabıdiń murager hanzadasy BAÁ men Qazaqstan Islam Yntymaqtastyǵy Uıymy aıasynda tyǵyz yntymaqtastyq ornatqanyn atap ótti.

«Bizdiń memleketter atalmysh uıymnyń abyroıyn arttyrý úshin birge kúsh salyp keledi. Qazaqstannyń ıslam álemindegi orny erekshe», - dedi sheıh.

Ol sondaı-aq, QR Prezıdentiniń sapary eki el arasyndaǵy ózara qarym-qatynasty jańa deńgeıge kóteretinine senim bildirdi.

«Joǵary deńgeıdegi kelissóz barysynda ekijaqty yntymaqtastyq máseleleri talqylandy. Sonymen birge, ekonomıkanyń kóptegen salasyndaǵy birqatar suraqty talqylaý josparlanǵan. Kezdesý qorytyndysyna saı birqatar qujatqa qol qoıylady», - dedi Muhammed ben Zaıd Ál Nahaıan.

Eske sala ketsek, Memleket basshysy Qasym-Jomart Toqaev resmı saparmen Birikken Arab Ámirlikterinde júr.