Qazaqstannyń isker áıelderi Túrkistandy damytýǵa úles qosady
TÚRKІSTAN. QazAqparat - Búgin Túrkistan oblysynyń ákimi Janseıit Túımebaev Qazaqstandaǵy isker áıelder qaýymdastyǵynyń prezıdenti Raýshan Sársembaevamen kezdesti. Basqosýǵa qaýymdastyqtyń Túrkistan oblysy men Shymkent qalasyndaǵy ókildikteriniń jetekshi hanymdary qatysty, dep habarlaıdy QazAqparat tilshisi.
Іsker áıelder qaýymdastyǵynyń tóraıymdarymen bolǵan kezdesýde jańa Túrkistannyń bolashaqtaǵy keskin-kelbeti, aldaǵy josparlary keńinen sóz boldy. Názik jandar qaýymy óńir basshysyn jan-jaqty qoldaıtyndaryn, aımaqty odan ári kórkeıtýge óz úlesterin qosýǵa ázir ekendikterin jetkizdi. Barsha isker áıelder qaýymynyń atynan sóz alǵan Raýshan Sársembaeva Túrkistan oblysynyń ákimdigimen birlesken jobalar jasaý jóninde usynys aıtty. Іsker hanym búkil túrki tildes halyqtardyń ata jurty - Túrkistandaǵy qyzmet kórsetý sapasyn halyqaralyq talaptarǵa saı etip uıymdastyrýǵa atsalysqysy keletinin jetkizdi. Týrıster kóp keletin ortalyqtaǵy servıs máselesin arnaıy mamandardy oqytý arqyly damytyp, kádesyı jasaý ortalyqtaryn da kóptep ashýdy maqsat etip otyr. Áıelder qaýymdastyǵynyń túrli salalarda tájirıbege baı ekenin aıtqan ol Túrkistan shaharynyń damýyna názik jandardyń qýaty men kúshin jumsaýǵa nıetti ekenin bildirdi.
Jıynǵa qatysýshy qyz-kelinshekterdiń usynys-tilekterin muqııat tyńdaǵan oblys ákimi Janseıit Túımebaev atalǵan jobalardy birlese ázirleýge daıyn ekenin, aldaǵy ýaqytta túrli jumystardy birige atqarýdy qoldaıtynyn atap ótti.
