Qazaqstannyń isker áıelderi ózara myqtyny sahnada anyqtady
ASTANA. QazAqparat - Astanada «Business Lady Qazaqstan» baıqaýy ótti, dep habarlaıdy QazAqparat elorda ákimdiginiń resmı saıtyna silteme jasap.
Baıqaýdyń maqsaty - jas áıelder arasynda belsendi ómirlik pozıtsııany qalyptastyrý, Qazaqstan isker áıelderiniń ımıdjin kóterý, sondaı-aq bızneste, qoǵamdyq ómirde, saıasatta jáne shyǵarmashylyqta tabysqa jetken áıeldiń obrazyn qalyptastyrý.
Bıznes-hanymdardyń konkýrsy úsh kezeńnen turdy: óz jobasy týraly vıdeotanystyrylym, erýdıtsııa jáne shyǵarmashylyq nomer.
«Baıqaýǵa qatysqandardyń barlyǵy da erekshe ári sulý. Olar óz aımaqtarynda ótken irikteý kezeńniń jeńimpazdary. Munda kileń myqtylar jınaldy», - dedi ádilqazylar múshesi, Sınergııa ýnıversıtetiniń prezıdenti Baýyrjan Qasymbirgebaev.
Nátıjesinde, aqtóbelik «Mediapro» balalar prodıýser ortalyǵynyń basshysy Janargúl Dosova jeńiske jetti.
«Bizde shyǵarmashylyq akademııa bar. Onda balalardyń vokal, akterlik sheberlik, horeografııa syndy baǵyttarda bilimi men qabiletin ushtaımyz. Bizde kóptegen kınojobalar, kınofestıvalder bar. Sondaı-aq, balalar telejobalarǵa da qatysady. Al men sahnaǵa shyqsam dep armandaıtynmyn. Sol armandarymnyń barlyǵy oryndalýda», - dep bólisti áserimen Janargúl Dosova.
Respýblıkalyq baıqaý Astana ákimdigi men «Atameken» UKP qoldaýymen ótti.
