Qazaqstannyń isker áıelderi el halqyna úndeý jasady
NUR-SULTAN. QazAqparat – «Qazaqstan Respýblıkasynyń isker áıelderi qaýymdastyǵy» elimiz úshin qıyn sátte jurtshylyqty birlikke shaqyrdy, dep habarlaıdy QazAqparat.
«Tuńǵysh Prezıdent - Elbasy Nursultan Nazarbaevtyń koronavırýs indetimen baılanysty jaǵdaıǵa oraı Qazaqstan halqyna úndeýin qoldaǵan Qazaqstannyń isker áıelder qaýymdastyǵy jurtshylyqty elimiz úshin qıyn sátte bir-birin qoldaýǵa, tirshilikti jáne adamdardyń densaýlyǵyn qamtamasyz etetin qyzmetterge barynsha kómek kórsetýge shaqyrady. Eldegi tótenshe jaǵdaı kezinde sabyrlyq saqtap, jaqyndarǵa qamqorlyq tanytý, ózin-ózi oqshaýlaý, qoǵamdaǵy kez kelgen qarym-qatynasty tómendetý, sonymen qatar sanıtarlyq qaýipsizdik pen aldyn alý erejesin saqtaý barynsha mańyzdy», - delingen qaýymdastyq taratqan aqparatta.
Taratylǵan úndeýde QR Prezıdenti Qasym-Jomart Toqaevtyń arnaıy rejim engizýi jáne el Úkimetiniń júzege asyryp jatqan sharalary koronavırýs taralýy jaǵdaıyndaǵy eń durys sheshim ekendigi atalyp ótiledi.
«Qazaqstannyń isker áıelderi qaýymdastyǵy Elbasy Nursultan Nazarbaevtyń osynaý qıyn-qystaý kezeńde elge qoldaý kórsetý úshin respýblıkalyq qor qurý jónindegi bastamasyn qoldaıdy. Búginde Qazaqstannyń isker áıelderi qaýymdastyǵy volonterlik negizde tótenshe jaǵdaı kezeńinde halyqtyń az qamtylǵan tobyn azyq-túlik toptamasymen, birinshi qajetti zattarmen qamtamasyz etýge kómek kórsetip jatyr. Sonymen qatar ózge de qarjylyq jáne rýhanı kómek kórsetý ústinde», - dep atap ótedi qaýymdastyq.
