Qazaqstannyń ishki týrızmnen alatyn tabysy barlyq kirisiniń 3 paıyzyn ǵana quraıdy
ASTANA. QazAqparat - Qazaqstannyń ishki týrızmnen alatyn tabysy barlyq kirisiniń 3 paıyzyn quraıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Parlamenti Májilisiniń depýtaty Elena Tarasenko málim etti.
«Búgingi tańda Qazaqstanda ishki týrızmnen alynatyn tabys barlyq kiristiń ne bári 3 paıyzyn ǵana quraıdy. Al bul kórsetkish damyǵan elderde shamamen 20-30 paıyz tóńireginde aýytqyp turady. Bizdiń oıymyzsha, qazirgi ýaqytta týrızm ınfraqurylymyn qarqyndy túrde jetildirip, týrıstik salany quqyqtyq turǵyda qamtamasyz etýimiz qajet. Buǵan qosa, týrıstik ónim quny kórsetiletin qyzmet sapasyna saı bolýy tıis», - dedi depýtat.
Onyń paıymynsha, týrıstik salanyń damýyn qamtamasyz etýdegi mindetti sharttardyń biri - týrızmge memlekettik deńgeıde qoldaý kórsetý.
«Týrıstik qyzmet ulttyq ekonomıkanyń quramdas bóligi sanalady. Sondyqtan onyń túıtkilderin júıeli ári keshendi túrde sheshý qajet. Osyndaı jumystar qolǵa alynar bolsa, onda týrızm Qazaqstannyń tartymdy salalarynyń birine aınala alady», - dedi E.Tarasenko.
