Qazaqstannyń ishki naryǵynda munaı tapshylyǵy bolýy múmkin - «Qazenerdjı» qaýymdastyǵy
ASTANA. 19 sáýir. QazAqparat - Geologııalyq barlaý jumystary atqarylmasa, Qazaqstannyń ishki naryǵynda munaı tapshylyǵy týyndaýy ábden múmkin. Bul týraly búgin «Qazenerdjı» qaýymdastyǵy keńesiniń otyrysynda uıymnyń bas dırektory Áset Maǵaýov málim etti.
Onyń aıtýynsha, Qazaqstan energııa resýrstaryna baı bolsa da, aldaǵy ýaqytta mıneraldy shıkizat bazasynyń tapshylyǵy baıqalady. Sebebi elimizde geologııalyq barlaý jumystary tıisti deńgeıde júrgizilmeıdi. «Qazaqstan Respýblıkasynda energııa resýrstaryn tıimdi paıdalanýdyń biryńǵaı saıasaty durys jolǵa qoıylmaǵan. Energetıkalyq tepe-teńdik joq. Al jańa ken oryndary ashylmasa, 2020 jyldan keıin elimizde óndirý (kómir, munaı jáne gaz sııaqty energııa resýrstary - avt.) kólemi azaıýy ábden múmkin. Onyń barlyǵy geologııalyq barlaý jumystarynyń mańyzdylyǵyn taǵy bir márte aıǵaqtap otyr», - deıdi Á.Maǵaýov. Uıymnyń bas dırektory atap kórsetkendeı, munaı óńdeý zaýyttary jańartylyp, Reseıden keletin munaıdyń kólemi azaıǵan jaǵdaıda eldiń ishki naryǵyna jetkiziletin munaıdy arttyrý qajet bolady. Al ýrannyń qazirgi qory áli 80-90 jylǵa jetedi.
