Qazaqstannyń ishki naryǵy qandaı azyq-túlikpen 100 paıyz qamtylǵan
Atalǵan másele boıynsha negizgi baıandama jasaǵan Aýyl sharýashylyǵy mınıstri Saparhan Omarovtyń aıtýynsha, «Agroónerkásip keshenin jáne eldiń aýyldyq aımaqtaryn damytýdy memlekettik retteý týraly» QR Zańyna sáıkes, halyq bir jylda tutynatyn azyq-túliktiń 80 paıyzy el ishinde óndirilse, onda memleket ózin ónimmen qamtamasyz etedi dep sanalady. Ótken jyly ishki naryqty negizgi azyq-túlik taýarlarymen qamtamasyz etý kórsetkishi 80 paıyzǵa jetti.
«Bul rette kúrish, qoı eti, jumyrtqa, un, nan, makaron, jarma, sút, kartoppen qamtamasyz etý 100 paıyzdan asyp otyr. Sıyr, shoshqa jáne jylqy etimen qamtamasyz etý tıisinshe 97,9, 98,2, 98,1 paıyzdy quraıdy. Ettiń ishki naryǵy ımporttyq jetkizilimderge táýeldi emes. Ósimdik maıymen qamtamasyz etý - 94,8, ashymal sút ónimderimen - 89,8 paıyzdy qurap otyr. Degenmen, jekelegen taýarlarda otandyq óndiristiń úlesi ishki tutynýda áli de tómen bolyp otyr. Olar: qus eti - 50,2 paıyz, irimshik pen súzbe - 58,4 paıyz, qant - 54,4 paıyz, shujyq ónimderi - 60,1 paıyz, alma - 69,5 paıyz, balyq - 62 paıyz. Eldi azyq-túlikpen qamtamasyz etýdiń bul kórsetishteri AÓK sýbektilerin memlekettik qoldaý baǵyttaryn qalyptastyrýda basty krıterıı sanalady», - dedi mınıstr.
Onyń atap ótýinshe, Úkimet 2021 jylǵa deıingi agorónerkásip keshenin damytýdyń memlekettik baǵdarlamasyn júzege asyryp jatyr. Ol agrarlyq sektordy keshendi jáne júıeli ádistermen qamtamasyz etedi.
«Baǵdarlama aıasynda 5 jyldyń ishinde qaıta óńdelgen ónim eksportynyń kólemin jáne eńbek ónimdiligin 2,5 ese arttyrýǵa qol jetkizý mindeti qoıylǵan. Qazirgi ýaqytta AÓK memlekettik baǵdarlamasy aıasynda ishki naryqty azyq-túlik ónimderimen toltyrýdyń barlyq qajetti sharalary qabyldanǵan. AÓK-te 16 baǵyt boıynsha sýbsıdııanyń 40 túri bar», - dedi S.Omarov.