Qazaqstannyń ishki kóshi-qonyn retteıtin baǵdarlama qabyldanýy tıis - depýtat A.Samaqova
ASTANA. 1 aqpan. QazAqparat /Qanat Mámetqazyuly/ - Qazaqstannyń ishki kóshi-qonyn retteıtin baǵdarlama qabyldanýy tıis.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Aıtkúl Samaqova osylaı málimdedi.
Depýtattyń aıtýynsha, byltyr qabyldanǵan halyqtyń kóshi-qony máselelerine arnalǵan zań boıynsha memlekettik mıgratsııalyq saıasattyń negizgi mindeti ishki kóshi-qon aǵynyn ońtaılandyrý bolyp tabylady. Sonymen qatar, qujatta el aýmaǵynda kóship-qonýshylardy durys ornalastyrý sharalary qarastyrylady.
«Degenmen, búgingi tańda elimizdiń ishki kóshi-qon úderisteri áli rettelmeı otyr. Statıstıka agenttiginiń málimetterine súıensek, elimizde jyl saıyn shamamen 3 myńǵa tarta qazaqstandyq belsendi kóshi-qon yqpalynda turady. Eldiń ishki aýmaǵynda árkim óz qalaýynsha kóship júr. 1991-2007 jyldar aralyǵynda ishki mıgranttardyń úlesi halyqtyń jalpy kóshi-qon úderisiniń 70 paıyzyn qurady. Bul atalǵan kezeńde 4,7 mln. qazaqstandyq el ishinde kóship-qondy degendi bildiredi», - deıdi A. Samaqova.
Depýtattyń paıymynsha, ishki kóshi-qonnyń negizin aýyldy jerdiń halqy, onyń ishinde jergilikti ult ókilderi quraıdy. «Jappaı qalaǵa aýǵan olar, úlken qalalardyń mańyn ıgerýge kirisip jatyr. Bunyń saldarynan aýqymdy problemalar oryn alýda. Áleýmettik shıelenis órshýde. Jastar qalaǵa aýǵandyqtan birqatar aýylda quldyraý sıpaty kórine bastaǵan. Toqtala ketetin taǵy bir jaıt, qoldanystaǵy zańǵa sáıkes ishki kóshi-qon kvotasy 2015 jyldan bastap engiziledi. Áıtkenimen obektıvti úderiske sanalatyn halyqtyń qalaǵa aǵylýy jalǵasa bermek. Endeshe bizdiń oıymyzsha Qazaqstannyń ishki kóshi-qonyn retteıtin arnaıy baǵdarlama qabyldaýdyń mańyzy zor bolmaq», - dedi A. Samaqova.
