Qazaqstannyń ishki kóshi-qon saıasaty jańa zańnama arqyly jetildirile túsedi
ASTANA. Aqpannyń 25-i. QazAqparat /Qanat Mámetqazyuly/ - Búgin QR Parlamenti Májilisinde «Halyqtyń kóshi-qony týraly» jáne «Qazaqstan Respýblıkasynyń keıbir zańnamalyq aktilerine azamattardy turǵylyqty jeri boıynsha tirkeý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti,
dep habarlaıdy QazAqparat.
Qazirgi sátte memlekette Qazaqstan azamattarynyń da, sheteldikterdiń de ishki kóshi-qony týraly aqparat múldem joq. Bul naqty óńirlerge qatysty memlekettik sheshimderdi boljamdaý jáne qabyldaý kezinde dálsizdikterdi negizdeıdi. Ekonomıkanyń aǵymdaǵy jaı-kúıin eskere otyryp, osy faktor qoǵamdyq quqyq tártibin qamtamasyz etýge de áser etedi. Osyǵan oraı ishki kóshi-qondy esepke alý, baqylaý jáne retteý máselelerin zańnamalyq turǵyda bekitý qajettiligi týyndaǵan. Sonymen birge ishki kóshi-qon máselesin zańnamalyq turǵyda bekitý maqsatynda «Halyqtyń kóshi-qony týraly» zańǵa ózgerister engizý qarastyrylyp otyr. Atap aıtqanda, azamattardyń turaqty turatyn jeri boıynsha tirkeýdi, al turatyn jerin aýystyrǵan jaǵdaıda - esepten shyǵýdy júzege asyrý mindeti aıqyndalady, tirkeý merzimderi belgilenedi. Sheteldik azamattar úshin turaqty nemese ýaqytsha turatyn jerin aýystyrǵan jaǵdaıda jańa kelgen jeri boıynsha tirkeý mindeti aıqyndaldy. Budan basqa, kóshi-qondy retteýdiń janama sharalaryn bekitý bóliginde Eńbek kodeksine ózgerister engizildi. Bul rette Eńbek kodeksinde jumys berýshiniń jergilikti turǵyndar bolyp tabylmaıtyn adamdardy eńbekke ornalastyrý týraly ýákiletti organdarǵa habarlaý mindeti aıqyndaldy. Eńbek shartynda jeke tulǵanyń tirkelgen ornyn bekitý bóliginde de ózgerister engizildi. Ákimshilik quqyq buzýshylyqtar týraly kodeksine «Halyqtyń kóshi-qony týraly» Zańda belgilengen normalarǵa sáıkes keltirýge baǵyttalǵan ózgerister engizildi, sonymen birge kóshi-qon salasyndaǵy quqyq buzýshylyq úshin jaýapkershilik kúsheıtildi, quqyq buzýshylyqtardyń jekelegen quramdary naqtylandy.
Mamandardyń aıtýynsha, atalǵan zań jobasyn qabyldaý kóshi-qon úderisterin tıisti túrde baqylaýdy qamtamasyz etip, elimizde jeke tulǵalardy esepke alý qamtamasyz etiledi dep boljanady. Al bul óz kezeginde, tutastaı alǵanda memlekettik saıasatty júzege asyrýdyń tıimdiligine áser etedi.
