Qazaqstannyń iri elektr stansalary jylytý maýsymyna daıyn

ASTANA. QazAqparat - Qazaqstannyń iri elektr stansalary jylytý maýsymyna tolyq daıyn. Bul týraly búgin «Samuryq-Energo» AQ Óndiris jáne aktıvterdi basqarý jónindegi basqarýshy dırektory Serik Túıtebaev aıtty,  dep habarlaıdy QazAqparat tilshisi.

«Búgingi kúni elimizdiń kómirmen jumys isteıtin barlyq elektr stansalarynda normaǵa sáıkes paıdalanylatyn qatty otyn jınaqtalǵan. «Samuryq-Energo» AQ-nyń barlyq energııa óndiretin jáne energııa taratatyn uıymdary jabdyqtardyń josparlanǵan jóndeý jumystaryn der ýaqytynda aıaqtady. Bekitilgen tártippen kúzgi-qysqy kezeńde jumysqa daıyndyǵy týraly pasporttar alyndy», - dedi ol.

Onyń aıtýynsha, holdıngtiń «Ekibastuz GRES-1», «Ekibastuz-GRES-2», «Moınaq SES», «Shardara SES», «Almaty elektr stansalary» uıymdary elektr jáne jylý júktemeleri belgilengen kestesiniń oryndalýyn qamtamasyz etip jatyr.

Sonymen qatar, Serik Túıtebaev «Bogatyr kómir» JShS jylý berý maýsymyna daıyndyq aıasynda tapsyrys berýshilerdiń barlyq suranysyn oryndaǵanyn atap ótti. Kenishte óndirilgen qatty otynnyń 80 paıyzǵa jýyǵy elektr energııasy men jylý óndirý úshin respýblıkanyń energııa óndirýshi kásiporyndaryna jiberilgen. Jalpy, aǵymdaǵy jyldyń 10 aıynda kenishte 36,5 mln tonna kómir óndirildi.