Qazaqstannyń iri balmuzdaq zaýyty tótenshe jaǵdaı kezinde qalaı jumys istep jatyr
ALMATY. QazAqparat – Qazaqstandyq «Shın-Laın» balmuzdaq zaýyty karantındik perımetri boıynsha jumys istep jatyr. Qazirgi ýaqytta kásiporyn qoımalaryn jaýyp, tolyqtaı oqshaýlandy, dep habarlaıdy QazAqparat tilshisi.
«Shın-Laın» zaýyty jumys istep tur. Tipti ónim kólemin ulǵaıtýdy qolǵa alǵan. 17 naýryzǵa deıin, táýligine 30 tonna balmuzdaq shyǵardy. Qazir ol 60 tonnaǵa jýyqtady. Kelesi aptadan bastap kúnine 80 tonnaǵa jetkizýdi josparlap otyr. Satylymdar da ósýde. Ótken jyldyń osy kezeńimen salystyrǵanda naýryzda shyqqan ónim salmaǵy boıynsha 26%-ǵa, aqshalaı quny boıynsha 35%-ǵa kóbeıdi.
«Shın-Laın» kompanııasyna bıyl 25 jyl toldy. Zaýyt tótenshe jaǵdaı jarııalanbaı turyp osy rejımge kóshken. Oǵan tyńǵylyqty daıyndalǵan.
Elimizde engizilgen tótenshe jaǵdaı rejıminde zaýyt qalaı jumys istep turǵany jóninde kompanııalar tobynyń prezıdenti Andreı Shın aıtyp berdi.
«Naýryz aıynyń ortasynda jumysshylarǵa jaǵdaı jasaý qolǵa alyndy. Atap aıtar bolsaq, olardy ornalastyrý, tamaqtandyrý máselesin sheshtik»,– deıdi Andreı Shın.
Zaýyt tolyq oqshaýlandy. Jumysshylarǵa jataqhana uıymdastyryldy. Onda barlyq jaǵdaı jasalǵan. Ashana men medıtsınalyq pýnkt jumys isteıdi. Aýysymnan shyqqan jumysshylar bos ýaqytynda tennıs nemese voleıbol oınaıdy. Aýlada dúken de bar. Jumysshylar tegin Wi-Fi–ǵa qosylǵan. Týystarymen áleýmettik jeli arqyly habarlasady. Jabyq perımetrde psıhologte jumys isteıdi.
«Shın-Laın» zaýyty tamaq ónimderiniń sapasyna qoıylatyn joǵary standarttar men talaptardy oryndaý maqsatynda tolyq oqshaýlandy. Karantın rejıminde jumys isteýge bel býdy. Zaýyt zamanaýı tehnologııa ádisterin qoldanady. Desekte, quraldardy adamdar basqarady. Sondyqtan jumysshylardyń densaýlyǵy biz úshin óte mańyzdy. Qazir 400 adam jabyq perımetrde jumys isteıdi . Eger adam sanyn kóbeıtý qajet bolsa, jańa kelgender arnaıy bólmede 14 kún karantınde bolady jáne medıtsınalyq qorytyndydan keıin jumysqa kirisedi», - deıdi ol.
Zaýytta barlyq sanıtarlyq talaptar saqtalady. Kásiporyn aýlasyna kiretin kólik sanyna shekteý qoıyldy. Zaýytqa qajetti zattardy jetkizetin kólikter aldymen dezınfektsııadan ótedi.
«Buǵan deıin «Shın–Laın» shıkizatty Malaızııa, Ońtústik Koreıa, Reseı, Belarýs jáne Eýropadan aldy. Qazirgi ýaqytta ony otandyq ónimderge aýystyrý jumystary júrgizilýde. Ázirge, kompanııa balmuzdaqtyń eń tanymal 30 túrin shyǵarýda. Negizi 140 túri bar», - dep qorytyndylady Andreı Shın.
