Qazaqstannyń Iordanııadaǵy elshisi sol eldegi sırııalyq bosqyndardyń jaı-kúıin aıtyp berdi
ASTANA. QazAqparat - BAQ aldynda baspasóz máslıhatyn ótkizgen QR-nyń Iordanııa Hashımıt Koroldigindegi Tótenshe jáne ókiletti elshisi Azamat Berdibaı sol memlekettegi sırııalyq bosqyndardyń jaı-kúıi týraly aıtyp berdi, dep habarlaıdy «QazAqparat» HAA tilshisi.
«Iordanııanyń ekonomıkalyq jaǵdaıyna kórshiles elderdegi ahýaldar álbette áserin tıgizedi. Máselen, Sırııadan mıllıonǵa jýyq bosqynnyń kóshi óz kezeginde aýqymdy ekonomıkalyq qıyndyqtar týdyryp otyr. Búgingi tańda sırııalyq bosqyndarǵa ártúrli esepter boıynsha Iordanııa ekonomıkasynyń tórtten biri jumsalýda. Bul protsesterge qaramastan, Iordanııa Hashımıt Koroldiginiń Koroli Abdalla ІІ ben ál-Hýseınniń basshylyǵyndaǵy bılik saıasatty sátti júrgizip otyr», - deıdi ol.
Elshiniń aıtýynsha, Iordanııada 9 mln halyq bar degen kúnde onyń 2,5 mıllıony shamamen Sırııadan nemese basqa elden kelgen bosqyndar eken.
«Bul eldiń bıýdjetine aıtarlyqtaı salmaq salyp turǵanyn atap ótý kerek. Bosqyndar kóshi ekstremıstik ıdeıalardyń taralý qaýpin de týǵyzady. BUU bul elge Sırııadan 650 myń bosqyn keldi dese, Iordanııanyń resmı bıligi 1,4 mln bosqyn kelgenin alǵa tartady. Meniń ózim de bunyń kýási bolyp, Iordanııanyń soltústigindegi lagerlerde bosqyn otbasylardy kórdim. Ártúrli esep boıynsha bosqyndardyń 140 myńy balalar. Bosqyndardyń balalary ıordanııalyqlardyń balalary oqıtyn mektepterde bilim alyp jatyr. Bala sany artyp ketkendikten, bilim ordalarynda úsh aýysymda sabaq júredi», - deıdi elshi.
Azamat Berdibaı sonymen qatar, Arab-Izraıl soǵysynan beri 1 mıllıonǵa jýyq bosqyn Iordanııadan pana taýyp otyrǵanyn aıtady.
«Iordanııa SІM-niń resmı aqparatyna súıensek, Sırııa bosqyndar úshin jylyna bıýdjetten 2,5 mlrd AQSh dollaryn jumsaıdy. Sońǵy jyldary 10 mlrd AQSh dollary bosqyndardyń lagerlerin ustaý, olardyń densaýlyǵy men bilimine jumsalǵan. Osyǵan qaramastan, Iordanııadaǵy reformalar osy eldiń turaqtylyǵyn saqtap otyr», - deıdi elshi.
