Qazaqstannyń Iordanııadaǵy Elshiliginde jýrnalıster úshin brıfıng ótkizildi
ASTANA. Aqpannyń 10-y. QazAqparat. Aqpanynnyń 9-da Qazaqstan Respýblıkasynyń Iordanııadaǵy Elshiliginde Koroldiktegi «Aqparattyq Petra Agenttiginiń» tilshisi Maýlýd Raqıbatpen, «Ál-Raı (Pikir)» gazetiniń jýrnalısi Halıa Ǵýdýanmen, «Ál-Dýstýr (Konstıtýtsııa)» gazetiniń tilshisi Madı Iısamen, «Ál-Ǵad ál-Ýrdýnı (Iordanııanyń erteńgi kúni)» gazetiniń jýrnalısi Halıa Abý ál-Hıdjlıamen jáne aǵylshyn tilinde shyǵatyn «Djordan Taıms» gazetiniń tilshisi Hanı ál-Hazaımamen kezdesý bolyp, olarǵa arnalǵan brıfıng ótkizildi,
dep habarlaıdy Elshiliktiń baspasóz qyzmeti.
Joǵaryda atalǵan baspasóz ókilderimen ótken máslıhat Qazaqstan Respýblıkasynyń Prezıdenti N.Á.Nazarbaevtyń Qazaqstan halqyna arnaǵan jyl saıynǵy Joldaýynyń negizgi qaǵıdalaryn ıordanııa jurtshylyǵyna túsindirý jáne nasıhattaý maqsatynda, sonymen qatar, Elshiliktiń belgilengen is-sharalar josparyna sáıkes uıymdastyryldy.
Joldaýdyń mátinderi jýrnalısterge berilip, Elbasymyzdyń Joldaýda anyqtap bergen aldaǵy onjyldyqta atqarar qyrýar jumystar jáne de ár sala boıynsha josparlanǵan is-sharalar jóninde elshi B.Sársenbaev baıandap berdi. Sondaı-aq, ıordandyq tilshilerge 2009 jyldyń qarashasynda QR Prezıdenti N.Á.Nazarbaevtyń Iordanııaǵa jasaǵan resmı saparynyń nátıjesimen jáne qazirgi kezdegi eki taraptyń qol jetken ýaǵdalastyqtardy is-júzine asyrýǵa baǵyttalǵan naqty áreketteri jaıly habarlady.
Brıfıngte BAQ ókilderi Joldaýǵa qatysty jáne eki jaqty yntymaqtastyqtyń damý keleshegi jónindegi áńgimeni úlken yqylaspen tyńdap, qyzyǵýshylyq tanytty.
Iordanııanyń baspasóz betterinde jaqyn arada osy taqyryp tóńireginde maqalalar jaryq kóredi dep kútilýde.
