Qazaqstannyń ınvestıtsııalyq ombýdsmen ınstıtýty qanshalyqty tıimdi
Memleket basshysy Nursultan Nazarbaev óziniń 2015 jylǵy 30 qarashadaǵy «Qazaqstan jańa jahandyq naqty ahýalda: Ósim, reformalar, damý» Qazaqstan halqyna joldaýynda: «Transulttyq korporatsııalarǵa ekpin túsire otyryp, jeke ınvestıtsııalar tartý mańyzdy. Biz «kúrdeli ınvestıtsııalar» tartý úshin ońtaıly orta qalyptastyrýymyz kerek. Osy jyly «Astana» Halyqaralyq qarjy ortalyǵyn qurý týraly sheshim qabyldandy. Ol ıslamdyq qarjylandyrý, prıvat-bankıng jáne qaıta saqtandyrý salalarynda óńirlik hab bolady. Qazaqstan kúshti ınstıtýttary, bilikti, tıimdi jáne boljamdy úkimeti bar óńirdegi kóshbasshy-elge aınalýy tıis. Bizde ozyq tehnıkalyq kadrlar, álemdik deńgeıdegi ınfraqurylymdar bolýy tıis, qoǵamdyq tártip pen adamdardyń jeke qaýipsizdigi qamtamasyz etilýi kerek», - degen bolatyn.
Sonymen qatar Elbasy ınvestıtsııalyq ahýaldy jetildirýge baǵyttalǵan reformalardy ári qaraı jalǵastyrý EYDU jáne basqa da halyqaralyq qarjy ınstıtýttarymen birlesip júrgizilýi tıistigin basa aıtqan edi. Osydan keıin alǵa qoıylǵan maqsattardy sheshý úshin Qazaqstanda ınvestıtsııalyq ombýdsmen ınstıtýty quryldy.
Qazirgi tańda 2014 jylǵy 12 maýsymdaǵy № 209-V «Qazaqstan Respýblıkasynyń keıbir zańnamalyq aktilerine ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańymen engizilgen Investıtsııalyq ombýdsmen qyzmet etýde. Investıtsııalyq ombýdsmenniń róli ınvestorlardyń zańdy múddeleri men quqyqtaryn qorǵaý bolyp tabylady. Investıtsııalyq ombýdsmenniń qyzmeti ınvestıtsııalar boıynsha quzyretti organmen qamtamasyz etiledi. 2014 jylǵy 30 qazandaǵy №1153 QR QJ Investıtsııalyq ombýdsmenniń qyzmeti týraly ereje bekitildi. 2015 jylǵy 25 mamyrda Investıtsııalyq ombýdsmenniń buıryǵymen Qazaqstan Respýblıkasynda ınvestıtsııalyq qyzmetti júzege asyrý barysynda týyndaǵan máseleler boıynsha Jumys toby quryldy. Jumys tobynyń quramyna Bas prokýratýra, QR Ádilet mınıstrligi, QR UEM, QR SІM, QR EM, QR QM, QR AShM, QR BǴM, QR MSM, QR DSÁDM-teriniń birinshi orynbasarlary kiredi. 2015 jyldan beri ınvestıtsııalyq ombýdsmen qyzmetine QR Investıtsııalar jáne damý mınıstri Jeńis Qasymbek taǵaıyndalǵan.
Investıtsııalyq ombýdsmen ınstıtýtyn qoldaý úshin «KAZNEXINVEST» EIUA» AQ janyndaǵy ınvestorlardyń problemalyq máselelerin jınaqtaý jáne olardy sheshý boıynsha jumys júrgizetin Investorlarǵa qoldaý kórsetý ortalyǵy jumys atqarýda.
Sheteldik ınvestorlarmen tikeleı jáne keri baılanysty qalyptastyrý jáne júıelendirý, sondaı-aq ınvestıtsııalyq ombýdsmenniń júıelik jumysyn tezdetý maqsatynda www.invest.gov.kz saıtynda on-line platformasy iske qosylyp, ol ınvestorlardyń ótinishin alýdy jeńildetip, bıýrokratııany tómendetti. Investorlardyń aıtarlyqtaı jıi kezdesetin qıyndyqtary memlekettik retteýdiń myna salalaryn qamtıdy: salyq jáne keden zańnamasy; vızalyq, mıgratsııalyq, eńbek zańnamasy; qurylys jáne lıtsenzııalaý salasyndaǵy zańnama; jer qatynastaryn retteıtin zańnama; sondaı-aq, osy zańnamalardy qoldanýda týyndaıtyn problemalar.
QR Investıtsııalar jáne damý mınıstrligi Investıtsııalar jónindegi komıtetiniń málimetterine sáıkes, 2016 jyldyń qańtar-qarashasynda Investıtsııalyq ombýdsmenniń atyna sheteldik jáne otandyq ınvestorlardan 45 jańa ótinim kelip túsken. Onyń ishinde 40 paıyzǵa jýyǵyna qatysty ońtaıly nátıje bar, 30 paıyzy sottyń talqylaýyna baılanysty qarastyrylmaıtyn boldy, al qalǵandary boıynsha tıisti jumystar júrgizilip jatyr
Investorlar kóbinese salyqtyq, kedendik jáne eńbek zańnamasy baǵyttarynda qıyndyqtarǵa tap bolatynyn, sondaı-aq lıtsenzııalaý men jer qatynastary salasynda kedergiler bar ekendigin jetkizgen. Olardyń ótinimderin qarastyrý nátıjesi boıynsha Qazaqstan Respýblıkasy zańnamasyna ózgertýler men tolyqtyrýlar engizý jóninde usynystar ázirlengen. Al usynystar tıisti memlekettik organdardyń qaraýyna jiberilgen. Jalpy, Qazaqstanǵa qarjy salatyn ınvestorlardyń barlyq problemasy ınvestıtsııalyq ombýdsmenniń jiti nazarynda. Muny osydan bir aı buryn ótken Úkimet otyrysynda elimizdiń Investıtsııalar jáne damý mınıstri Jeńis Qasymbek atap ótken bolatyn.
«Biz elimizde burynnan jumys isteıtin, qaıta ınvestıtsııa quıyp jatqan ınvestorlardyń da jumysyn únemi nazarymyzda ustaımyz. Olardyń atqaryp jatqan qyzmetine únemi monıtorıng júrgizip, baqylap otyramyz. Olarmen 200-den asa kezdesýler ótkizip, máseleler anyqtaldy. Barlyq problemalar Investıtsııalyq ombýdsmen qyzmeti arqyly qaralyp keledi», - degen edi ol.
Al taıaýda ótken Úkimettiń selektorlyq rejimdegi otyrysynda Ulttyq ekonomıka mınıstri Qýandyq Bıshimbaev aǵymdaǵy jylǵy 11 aıda ınvestıtsııalar kólemi 4,7 paıyzǵa artyp, 6 trln. teńgege deıin óskendigin aıtqan bolatyn.
««Nurly jol» memlekettik baǵdarlamasy, «IIDMB» jáne daǵdarysqa qarsy baǵdarlamalar aıasynda ındýstrııalyq-ınnovatsııalyq jáne ınfraqurylymdyq jobalardy iske asyrý ósýge yqpal etti. Jyl basynan beri tikeleı sheteldik ınvestıtsııalardyń oń qarqynyn ataýǵa bolady. Máselen, aǵymdaǵy jylǵy qańtar-qyrkúıekte tikeleı sheteldik ınvestıtsııalardyń taza aǵyny 12,1 mlrd. AQSh dollaryn qurady, bul ótken jylǵy deńgeıden 4,4 esege joǵary»,- dedi Bıshimbaev.
Qoryta aıtqanda, elimizdegi ınvestıtsııalyq ahýal turaqty. Sheteldik ınvestorlardyń Qazaqstan ekonomıkasyna ınvestıtsııa salý deńgeıi joǵary bolyp otyr. Al oǵan ınvestıtsııalyq ombýdsmen ınstıtýty óz septigin tıgizip otyrǵany sózsiz.
