Qazaqstannyń ınternet keńistigi dinı baǵyttaǵy «Nazar sal» atty jańa saıtpen tolyǵýy múmkin
ASTANA. 15 qarasha. QazAqparat - «Nazar sal» degen ataýmen ınternet keńistigindegi ekstremızmnen saqtandyratyn saıt jasaý qajet.
Bul týraly búgin elordada ótip jatqan Qazaqstan din tanýshylarynyń ІІ Forýmynda QR Din isteri agenttigine qarasty Mádenıetter men dinderdiń halyqaralyq ortalyǵynyń dırektory Aıdar Ábýov aıtty.
Jastardy ınternet keńistigindegi ekstremıstik ıdeıalardyń yqpalynan saqtandyrýdyń tıimdi tásili aqparattyq túsindirý jumys ekindigin basa aıtqan ol: «Osy oraıda QR Musylmandary dinı basqarmasy, QR Din isteri agenttigi, Bilim jáne ǵylym mınıstrligi, túrli zertteý ortalyqtary «Nazar sal» degen ataýmen ınternet keńistigindegi ekstremızmnen saqtandyrý baǵytynda qyzmet isteıtin saıt daıarlaý qajet dep sanaımyn», - dedi.
Ortalyq basshysynyń atap ótýinshe, atalǵan saıtta ekstremıstik saıttarda keńinen qoldanylatyn djıhad, modjahed, shahıd sózderiniń durys maǵynasy túsindirilip, ektremızmniń basty belgileri kórsetilgeni durys.
«Din atyn, sonyń ishinde ıslam atyn jamylatyn ekstremıstik saıttardy ajyratý men anyqtaý, árıne tek mamandardyń qoldarynan keledi. Sol sebepti dintaný páninen joǵary oqý oryndarynyń ustazdaryna dintanýshy sarapshylardyń qatysýmen ekstremıstik saıttardy anyqtaý ádisterine arnalǵan semınarlar uıymdastyrý nátıjeli bolmaq», - dedi A.Ábýov.
