Qazaqstannyń ınnovatsııalarǵa bóletin qarjy kólemi bolashaqta ulǵaıatyn bolady - K.Másimov
ASTANA. 6 jeltoqsan. QazAqparat /Aıdar Ospanalıev/ - Qazaqstannyń ınnovatsııalarǵa bóletin qarjy kólemi bolashaqta tek ulǵaıatyn bolady.
Bul týraly búgin Prezıdenttik ınnovatsııalyq klýbtyń alǵashqy otyrysynda Premer-Mınıstr Kárim Másimov málim etti.
Úkimet basshysynyń aıtýynsha, ınnovatsııalarǵa bólinetin qarjy kóleminiń ulǵaıatyny naqty sheshilgen másele. «Eger, árıne, bizge álemdik daǵdarys áser etpeıtin bolsa. Al daǵdarystyń bizdiń elimizdi de sharpýy múmkindigin eshkim de joqqa shyǵara almaıdy. Bul rette asyǵystyq tanytý da qaýipti, sol sebepti qarjy máselesine kelgende eldiń bıýdjettik múmkindikterine de qaraý kerek»,-dedi Premer-Mınıstr.
Sondaı-aq ol sózinde ótken aptada Memleket basshysynyń Almatyda ǵalymdarmen kezdesýi barysynda Úkimet aldyna naqty mindetter qoıǵandyǵyn, osyǵan qaraı Úkimet aldaǵy otyrystarynyń birin ınnovatsııalar men ǵylym arasyndaǵy baılanys máselesine arnaıtyndyǵyn atap kórsetti.
