Qazaqstannyń ındýstrııalandyrý saıasatynyń alǵashqy kezeńi de jemisti nátıjeler kórsetti- Muhammed Daýı

ASTANA. QazAqparat - Jumyssyzdyq turǵysynan alsaq, Eýropanyń birqatar elderimen salystyrǵanda Qazaqstan shyn máninde jetistikke jetken. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Birikken Ulttar Uıymy Ónerkásiptik damý jónindegi Bıznes, ınvestıtsııa jáne tehnologııalyq servıs departamentiniń dırektory (ıÝNIDO) Muhammed Daýı osylaı dep málimdedi.

Brıfıng «Nurly Jol-bolashaqqa bastar jol» Joldaýy aıasyndaǵy ónerkásiptik saıasat taqyrybynda órbigen bolatyn. Sóz arasynda BUU ókili álemniń damyǵan memleketteriniń tarıhyna toqtala kele, olardyń barlyǵynda derlik ındýstrııalandyrý men óndiris saıasatyna meılinshe basymdyq berilgenin atap ótti. Onyń aıtýynsha, Qazaqstannyń ındýstrııalandyrý saıasatynyń alǵashqy kezeńi de jemisti nátıjeler kórsetti.

«Meniń oıymsha, damýdaǵy asa mańyzdy ındıkatordyń biri - jumyssyzdyq. Qazaqstanda jumyssyzdyq deńgeıi 5-6 paıyzdy quraıdy. Al muny Eýropanyń basqa da damyǵan elderdiń birqatarymen salystyrsaq, onda qazaqstandyq ındýstrııalandyrýdyń shyn máninde tabysty bolǵanyn kóre alamyz. Máselen, Ispanııada, Italııada, tipti Frantsııada jumyssyzdyq deńgeıi qazir 10 paıyzdan asady, keıbir derekter boıynsha 15 paıyzǵa jetedi. Sonyń ishinde jastar arasyndaǵy jumyssyzdyq jaǵdaıy tipti alańdatady, bul - 25 paıyzdan asady», - dedi M. Daýı. Sonymen qatar, BUU ókili jańa ekonomıkalyq strategııaǵa toqtala kele, Elbasy naqty mindetter keshenin aıqyndaǵanyn, al basymdyq berilgen sektorlarda ınnovatsııaǵa, tehnologııaǵa úlken mańyz berilip otyrǵanyn atap ótti.

«Álbette, damý ınvestıtsııasyz bolmaıdy, al ınvestıtsııa tehnologııany tirek etedi. Endeshe, biz tabysqa jetý týraly oılasaq, ınnovatsııa osy joldaǵy basty parametr bolýy shart», - dedi M. Daýı.