Qazaqstannyń IKU-ǵa tóraǵalyǵy kezeńindegi negizgi basymdyqtary Dýshanbede aıtylatyn bolady
ASTANA. Mamyrdyń 11-i. QazAqparat /Ernur Aqanbaı/ - Mamyrdyń 18-i men 20-sy kúnderi Tájikstan astanasy Dýshanbede Islam konferentsııasy uıymy Syrtqy ister mınıstrleriniń 37-shi sessııasy ótedi.
Oǵan qatysatyn bizdiń eldiń delegatsııasyn EQYU-nyń is basyndaǵy tóraǵasy, QR Memlekettik hatshysy-Syrtqy ister mınıstri Qanat Saýdabaev bastap barady. Bul týraly búgin Astanadaǵy aptalyq brıfıngte QR Syrtqy ister mınıstrliginiń baspasóz hatshysy Іlııas Omarov málim etti, dep habarlaıdy QazAqparat.
«IKU Syrtqy ister mınıstrleriniń aldaǵy 37-shi sessııasy mańyzdy is-shara retinde qarastyrylyp otyr. Onyń barysynda Qazaqstan IKU-ǵa múshe elder Atqarýshy komıtetiniń quramyna kiredi, Uıymnyń barlyq mańyzdy sharalaryna jáne qujattaryn ázirleýge belsendi qatysýdy bastaıtyn bolady», dedi І. Omarov.
Onyń aıtýynsha, atalmysh forým eki jaqty formatta da, kópjaqty formatta da ózara qyzyǵýshylyq týǵyzatyn máselelerdiń keń aýqymyn talqylaýǵa múmkindik beredi. «Qazaqstan tarapy IKU Syrtqy ister mınıstrleriniń 37-shi sessııasynyń rezolıýtsııasyna ózekti usynystar men bastamalardy engizdi. Olar Uıymnyń tıisti qujattarynda kórinis tapty. Shara barysynda Q. Saýdabaev sóz sóıleıdi dep kútilýde, onda Qazaqstannyń IKU-ǵa tóraǵalyǵy kezeńindegi negizgi basymdyqtary kórsetiletin bolady», dedi І. Omarov.
