Qazaqstannyń halyqtyq ІRO baǵdarlamasy der kezinde jasalǵan jáne óte jaqsy bastama - FEAS prezıdenti
ALMATY. 29 qyrkúıek. QazAqparat /Erlik Erjanuly/ - Eýrazııalyq qor bırjasy federatsııasy (FEAS) Qazaqstannyń halyqtyq ІRO baǵdarlamasyn qoldaıdy. Bul búgin Almatyda FEAS-tiń 17-Bas assambleıasynyń qorytyndysyna arnalǵan baspasóz máslıhatynda aıtyldy.
«Qazaqstan kelesi jyly halyqtyq ІRO baǵdarlamasyn bastaýǵa daıyn ekenine kózimiz jetti. Bul der kezinde jasalǵan jáne óte jaqsy bastama. Bizdiń federatsııa ony qoldaıdy», - dedi FEAS prezıdenti jáne Ystambul qor bırjasynyń prezıdenti Hýseın Erkan. Bul alqaly basqosý kezinde Qazaqstan qor bırjasy Eýrazııalyq qor bırjasy federatsııasy, Ystambul qor bırjasy jáne Tegeran qor bırjasymen ekijaqty ynytmaqtastyq memorandýmdaryna qol qoıǵan bolatyn. H. Erkannyń aıtýynsha, FEAS-pen jasalǵan memorandým Qazaqstan qor bırjasyna óz qurylymyn damytý úshin Eýrazııalyq qor bırjasy federatsııasynyń kómek alýyna múmkindik beredi. FEAS qazirdiń ózinde Qazaqstan qor bırjasymen birge qyrǵyz qor bırjasyn damytýǵa kómektesý úshin onyń aktsıoneri bolyp otyr.
