Qazaqstannyń halyqqa qyzmet kórsetý avtoortalyqtary qalypty jumysqa kiristi
NUR-SULTAN. QazAqparat - «Azamattarǵa arnalǵan úkimet» memlekettik korporatsııasy elimizdiń barlyq oblysyndaǵy mamandandyrylǵan halyqqa qyzmet kórsetý ortalyqtaryndaǵy qyzmetter memlekettik standarttar saı, qalypty tártipte kórsetilip jatqanyn habarlady.
Búginde qyzmet alýshylardyń kóptigi Almaty qalasyndaǵy mamandandyrylǵan HQO-larda ǵana baıqalýda. Bul Almaty qalasynda kólikterdi alyp-satatyndardyń kóptigi men jaqyn jatqan aımaq turǵyndarynyń avtokólikterin sonda qaıta rásimdep, júrgizýshi kýáligin aýystyrýǵa baratynymen baılanysty.
QR ІІM 1 shildeden bastap málimetterdiń almasýyn qamtamasyz etetin jańa veb-modýldi iske qosýyna baılanysty, memlekettik organnyń aqparattyq júıesinen aqaý shyǵyp, sonyń saldarynan barlyq mamandandyrylǵan HQO-ǵa kelýshilerdiń ótinishteri der kezinde qaralmaı, úlken kezek týyndaǵan bolatyn.
Bul rette memlekettik korporatsııa óz tarapynan halyq narazylyǵyn basyp, kezekti taratý úshin qosymsha qyzmetkerlerdi tartyp, «sońǵy klıentke» deıin jumys istedi. Halyqqa yńǵaıly bolý úshin egov.kz portaly arqyly qyzmetti onlaın alýǵa kómektesetin keńesshi mamandar jumyldyryldy.
Aıta keteıik, kólikterdi qaıta tirkep, júrgizýshi kýáligin alý qyzmetteri boıynsha mamandandyrylǵan HQO-larda shildeniń 1-8 aralyǵynda 40 myńǵa jýyq qyzmet kórsetildi, onyń 9 myńnan astamy tek Almaty qalasyna tıesili.
