Qazaqstannyń halyqaralyq jıyntyq rezervteri 90 mlrd. dollarǵa jýyq qarjyny qamtyp otyr - Memleket basshysy
ASTANA. 2 qyrkúıek. QazAqparat - Qazaqstannyń birinshi jartyjyldyqtaǵy ishki jalpy óniminiń kólemi jaqsy kórsetkishke teń bolyp otyr. Bul týraly búgin besinshi shaqyrylǵan Parlamenttiń úshinshi sessııasynyń ashylýynda Elbasy Nursultan Nazarbaev aıtty.
«Birinshi jartyjyldyqtyń qorytyndysy boıynsha bizdiń eldiń ІJÓ 5 paıyzdan asty. Álemdik ekonomıkalyq úderistiń búgingi jaǵdaıynda bul - jaman emes kórsetkish», - dedi Memleket basshysy.
Sonymen qatar Prezıdent halyqtyń jan basyna shaqqandaǵy ІJÓ 12 myń AQSh dollarynan asqandyǵyn eske salyp ótti. Buǵan qosa, N. Nazarbaev Ulttyq qordyń valıýtalyq aktıvterin qosqanda Qazaqstannyń halyqaralyq jıyntyq rezervteri 90 mlrd. dollarǵa jýyq qarjyny qamtyp otyrǵandyǵyn aıtyp ótti.
Sóz sońynda Elbasy Qazaqstannyń ekonomıkasyna ınvestıtsııalaý úshin múmkindikterdi keńeıtý baǵytynda tıisti zańnamalyq sharalar iske asyrylyp jatqandyǵyn jetkizdi.
