Qazaqstannyń halyqaralyq rezervi 104 mlrd. dollardan asty - E.Dosaev
ASTANA. QazAqparat - Qazaqstannyń halyqaralyq rezervi 104 mlrd. dollardan asty. Bul týraly búgin Elbasy Nursultan Nazarbaevtyń tóraǵalyǵymen Aqordada ótken Úkimettiń keńeıtilgen otyrysynda QR Ulttyq ekonomıka mınıstri Erbolat Dosaev málim etti.
«2014 jylǵy 28 shildedegi jaǵdaı boıynsha eldiń halyqaralyq rezervi 104 mlrd. AQSh dollarynan asyp tústi. Onyń ishinde jalpy halyqaralyq rezerv 27,7 mlrd. AQSh dollaryn, al Ulttyq qor aktıvteri 76,3 AQSh dollaryn qurady», - dedi mınıstr.
E.Dosaevtyń atap ótýinshe, teńge baǵamy túzetilgennen keıin aǵymdaǵy jyldyń 1 tamyzynda ınflıatsııa 4,9 paıyzdy qurady. Al azyq-túlik taýarlarynyń baǵasy 5,4, azyq-túlik emes taýarlar 5, aqyly qyzmetter 4,3 paıyzǵa qymbattady.
«Úkimettiń birinshi kezekti sharalar jol kartasyn júzege asyrý aıasynda mınıstrlik ekonomıkany qoldaý boıynsha basymdyqty mindetterdi sheshýge basa nazar aýdardy», - dedi ol.
