Qazaqstannyń halyqaralyq qory 30 mlrd dollarǵa jýyqtady
NUR-SULTAN. QazAqparat - 2020 jylǵy aqpan aıynyń sońynda Qazaqstannyń halyqaralyq qory 29,9 mlrd dollardy qurady. Bul ótken jyldyń osyndaı kezeńimen (29,1 mlrd dollar) salystyrǵanda 2,6 paıyzǵa, osy jyldyń qańtarynan 1,9 paıyzǵa kóp, dep habarlaıdy QazAqparat tilshisi Finprom.kz saıtyna silteme jasap.
Qorlardyń valıýtalyq bóligi sáýirdegi jaǵdaı boıynsha birshama qysqaryp, ne bári 9,6 mlrd dollardy qurady. Al 2015 jyldyń aqpanynda onyń kólemi 21,3 mlrd dollar bolǵan edi. Halyqaralyq qordyń quramyndaǵy altyn kólemi qarqyndy ósip kele jatyr. Bir jyldyń ishinde Ulttyq banktyń altyn-valıýta qory qurylymyndaǵy monetarlyq altyn kólemi 33,7 paıyzǵa nemese 5,1 mlrd dollarǵa ulǵaıyp, 20,3 mlrd dollarǵa jetip otyr. Sońǵy 5 jyldyń ishinde altyn qorynyń úlesi 26,1 paıyzdan 67,9 paıyzǵa deıin artty.
Tolyqtaı alǵanda, halyqaralyq qorlardyń ósimi altyn satyp alý operatsııalaryn júrgizý, sonymen qatar onyń álemdik naryqtaǵy baǵasynyń kóterilýi esebinen oryn aldy. Aıtalyq, 2020 jyldyń 31 naýryzyndaǵy jaǵdaıǵa sáıkes, altynnyń 1 ýntsııasynyń baǵasy 1618,3 dollardy qurap, jyl basynan beri 5,4 paıyz ósti.
Aıta keterligi, álemniń kóptegen damyǵan elderine memlekettiń altyn-valıýta qoryndaǵy altyn úlesi basym bólikti alady. Máselen, EO elderinde memleket qoryndaǵy altyn úlesi ortasha eseppen 58,6 paıyzdy quraıdy. Osy jyldyń naýryzynda álem elderi ishinde AQSh-tyń altyn qory eń kóp boldy. Bul elde 8,1 myń tonna altyn bar. Al Qazaqstan altyn qory boıynsha jalpy álemdik reıtıngte 15-orynda tur. Elimizde 386,5 tonna altyn bar.
