Qazaqstannyń Halyqaralyq kınologııa federatsııasyna qosylý máselesi Jenevada talqylanyp jatyr

JENEVA. QazAqparat - Búgin Jenevada Halyqaralyq kınologııa federatsııasy bas assambleıasynyń otyrysy bastaldy. Jıynda talqyǵa shyǵarylǵan máseleniń biri - Qazaqstan kınologtary odaǵyn federatsııanyń tolyqqandy músheligine qabyldaý, dep habarlaıdy QazAqparat.

Daýys berý rásimine 77 memleket qatysady. Qazaqstannyń úmitkerligine qatysty oń sheshim qabyldanýy úshin olardyń basym bóligi qoldaý bildirýge tıis.

Qazaqstan kınologtary odaǵy úshin FCI múshesi bolý - óte mańyzdy, sebebi múshe memleket retinde qazaqy ıt tuqymdary tazy men tóbetti halyqaralyq deńgeıde tanytý úshin federatsııaǵa ótinish bere alady.

Eki kúnge sozylǵan bas assambleıanyń otyrysynan keıin «World Dog Show-2023» dúnıejúzilik chempıonaty bastalady.

Tarıhta alǵash ret bul chempıonatqa Qazaqstannan barǵan tazy tuqymdy eki ıt qatysady.

2022 jyly Memleket basshysy Qasym-Jomart Toqaev tıisti memlekettik organdarǵa ulttyq ıt tuqymdary – qazaqy tazy men tóbetti saqtaý jáne qalpyna keltirý, sondaı-aq olardy tóltýma qazaqy ıt tuqymdary retinde halyqaralyq deńgeıde tanytýdy tapsyrǵan bolatyn.

Bul máseleni QR Prezıdenti Іs basqarmasy óz qaraýyna alyp, jumysty júıeli túrde sheshý úshin memlekettik organdardyń jumysyn úılestirýmen shuǵyldandy.

Prezıdent tapsyrmasy boıynsha tıisti jumys toby qurylyp, Ekologııa jáne tabıǵı resýrstar mınıstrligi ókiletti organ retinde aıqyndaldy.

Eske sala keteıik, buǵan deıin Jenevada uıymdastyrylatyn «World Dog Show-2023» ıtter kórmesine Qazaqstannan eki tazy qatysatynyn habarlaǵan edik.